Hechos 4

Ri Pedro y ri Juan kekꞌam bꞌi pa qꞌatbꞌal tzij

1 Kꞌa kechꞌaꞌt ne ri Pedro y ri Juan kukꞌ ri winaq, echiriꞌ xekꞌun lo raj chakunel re ri Rocho Dios, ri aj wach ke ri e chajinel re ri Rocho Dios y jujun saduceos. 2 Rike lik kꞌo koyowal chikij ri Pedro y ri Juan ma kekꞌutun chikiwach ri tikawex puwi rukꞌastajibꞌal lo ri Jesús chikixoꞌl ri ekaminaq,* jekꞌuwaꞌ kakibꞌiꞌij: «Rukꞌastajibꞌal ri Jesús e kꞌutubꞌal re, chiqawach apanoq ri tikawex kekꞌastaj lo chikixoꞌl ri ekaminaq» kechaꞌ.

3 Ekꞌu ri e aj wach re ri Rocho Dios xetaqan che kechap bꞌi ri Pedro y ri Juan. Yey ruma kꞌu lik bꞌenaq qꞌij chik, xebꞌeꞌkiyaꞌa pa cárcel chaꞌ kataꞌ kichiꞌ kꞌa chukaꞌm qꞌij. 4 Pero chike ri xetaw re ri xubꞌiꞌij ri Pedro, lik e kꞌi ri xkubꞌiꞌ kikꞌuꞌx rukꞌ ri Jesús; yey we kebꞌajilax xew ri achijabꞌ, laj e woꞌobꞌ mil xekojow re Rire.

5 Chukaꞌm qꞌij kꞌut xkimol kibꞌ pa ri tinamit Jerusalem raj wach ke raj judiꞌabꞌ kukꞌ ri nimaq winaq re ri tinamit y raj kꞌutunel re ri tzijpixabꞌ. 6 Kꞌo chiriꞌ ri Anás ri kajawal raj chakunel pa Rocho Dios; yey e kꞌo ri Caifás, ri Juan, ri Alejandro y jujun chik kꞌo chux chike ri kajawal raj chakunel pa Rocho Dios.†Konoje waꞌ e kukꞌil ri uchapom wi ribꞌ ri qꞌatbꞌal tzij. Kil nota Jn. 18:19 pakiwi ri Anás y ri Caifás. 7 Xekiya kꞌu ri Pedro y ri Juan chikinikꞌajal y xkitzꞌonoj chike:

—¿China xyaꞌw piqꞌabꞌ o china pubꞌiꞌ xiꞌan riꞌix waꞌ? —xecha chike.

8 Ekꞌu ri Pedro, rukꞌ ruchuqꞌabꞌ ri Santowilaj Ruxlabꞌixel ri Dios, xubꞌiꞌij chike:

—Tape alaq, alaq aj wach re ri tinamit y alaq nimaq winaq re Israel, 9 ma e waqꞌij kataꞌ qachiꞌ puwi ri utz xꞌan che wa jun achi yewaꞌ chaꞌ ketaꞌmaxik suꞌanik xkunutajik. 10 Ekꞌu riꞌ woꞌora kaqaqꞌalajisaj chiwach onoje alaq y chikiwach konoje ri tinamit Israel: Waꞌ waꞌchi kꞌo chiwach alaq xkunutaj chupa rubꞌiꞌ ri Qanimajawal Jesucristo re Nazaret, ri xkamisaj alaq chwa cruz yey ri Dios xukꞌastajisaj lo chikixoꞌl ri ekaminaq.

11 »E pachaꞌ ri kubꞌiꞌij Ruchꞌaꞌtem ri Dios:

E rabꞌaj kꞌaqital kan kuma raj yakal ja,

e abꞌaj waꞌ lik xajawaxik chaꞌ katikiꞌ lo ri ja Sal. 118:22

kachaꞌ.

Ralaq e alaq pachaꞌ wa e aj yakal ja yey ri Jesús e ri Abꞌaj. 12 Xew kꞌu rukꞌ ri Jesús kariqitaj kolobꞌetajik, ma na jinta chi juna bꞌiꞌaj che ruwachulew yaꞌtal lo chike ri tikawex chaꞌ ruma riꞌ kojkolobꞌetajik —xchaꞌ.

13 Ekꞌu raj wach re ri tinamit xkilo ri Pedro y ri Juan na kakixiꞌij ta kꞌana kibꞌ ketzijon puwi ri Utzilaj Tzij, tobꞌ waꞌ waꞌchijabꞌ na e ta tijotal pachaꞌ rike yey xa ne e kukꞌil rachijabꞌ e aj chak re ri tinamit. Lik xkam kꞌu kanimaꞌ riꞌ chike y xkimaj usukꞌ e janipa taq ri kakiꞌano y ri kimajom ri Pedro y ri Juan, e ruma ri xekꞌojiꞌ rukꞌ ri Jesús, ri kitijonel. 14 Yey na utz tane kꞌu riꞌ kakibꞌiꞌij na kunutajinaq ta ri sik, ma waꞌ waꞌchi takꞌal chiriꞌ chikiwach kukꞌ ri Pedro y ri Juan.

15 Ekꞌu ri xkiꞌano e xetaqan che chaꞌ ri Pedro y ri Juan kebꞌel bꞌi joqꞌotaj pa ri luwar re ri qꞌatbꞌal tzij, y xew kꞌu xekanaj raj qꞌatal tzij chaꞌ kechꞌaꞌt chikiwach. 16 Jekꞌuwaꞌ xkibꞌiꞌij chikiwach: «¿Saꞌ ri kaqaꞌan chike waꞌchijabꞌ? Ma ri kꞌutubꞌal re kunanik ꞌanatal kuma rike,*Hch. 3:1-10 lik qꞌalajininaq chikiwach konoje ri ejeqel Jerusalem yey lik na utz taj kaqewaj. 17 Ri qaꞌanaꞌ e qaxibꞌij kipa chaꞌ na ketzijon ta chi kꞌana chwach junoq chupa rubꞌiꞌ wa jun achi, y jelaꞌ na keꞌek ta chi utzijoxik waꞌ» xechaꞌ.

18 Xekisikꞌij kꞌu ri Pedro y ri Juan y lik xekitaq che na ketzijon taj y na kekꞌutun ta chi ne kꞌana pa rubꞌiꞌ ri Jesús.

19 Pero ri Pedro y ri Juan xkikꞌul uwach:

—Chꞌobꞌo pe ralaq: ¿Usukꞌ nawi chwach ri Dios e kaqakoj tzij ralaq chwa ri kaqakoj utzij Rire? 20 Ma riꞌoj, na utz taj kaqoqꞌotaj ubꞌiꞌxikil janipa ri qilom y ri qatom —xechaꞌ.

21 Ekꞌu ri e aj wach lik xkixibꞌij kipa. Tekꞌuchiriꞌ, xekiyolopij bꞌi ma na xkiriq taj suꞌanik kekiya pa kꞌaxkꞌobꞌik ruma kakixiꞌij kibꞌ chikiwach ri winaq re ri tinamit. Ma konoje lik kakiyak uqꞌij ri Dios ruma ri xkilo. 22 Yey lik qꞌalaj e rukꞌ ruchuqꞌabꞌ ri Dios xꞌaniꞌ wi ri kꞌutubꞌal re kunanik, ma waꞌchi xkunutajik, ralaxibꞌem sik yey ikꞌowinaq chi pa cuarenta rujunabꞌ.

Ri kikojom rubꞌiꞌ ri Cristo kakitzꞌonoj kichuqꞌabꞌ che ri Dios

23 Echiriꞌ xeyolopix bꞌi, ri Pedro y ri Juan xebꞌek kukꞌ ri kachbꞌiꞌil y xkitzijoj chike janipa ri bꞌiꞌtal bꞌi chike kuma ri nimaq e aj chakunel pa Rocho Dios y ri nimaq winaq re ri tinamit. 24 Echiriꞌ rike xkita waꞌ, konoje xa jun kikꞌuꞌx xkijeq kakiꞌan orar chwach ri Dios, jewaꞌ kakibꞌiꞌij:

«¡Lal Dios Qajawxel, Lal ꞌanayom la ruwa kaj, ruwachulew, ri mar y ronoje ri kꞌo che taq waꞌ! 25 Yey ruma ri David ri aj chak la, jewaꞌ xbꞌiꞌij la ojertan:

¿Suꞌchak lik ketukuk taq ri winaq

yey taq ri tinamit xew kakinoꞌjij ri na jinta uchak?

26 Ma xkimol kibꞌ ri taqanelabꞌ y ri e aj wach che ruwachulew,

xkiꞌan kꞌu xa jun che kibꞌ

y xebꞌek chirij ri Dios Qajawxel

y chirij ri Cristo, Ruchaꞌoꞌn lo Rire. Sal. 2:1-2

27 Waꞌ lik qatzij, ma chupa wa tinamit oj kꞌo wi, ri Herodes rukꞌ ri Poncio Pilato xkimol kibꞌ kukꞌ ri winaq e aj Israel y kukꞌ ri na e ta aj Israel; yey junam kꞌu xeyaktaj chirij ri Jesús, ri Santowilaj Aj Chak la, ri Jun xchaꞌ lo la. 28 Jekꞌulaꞌ, e xkiꞌano janipa ri chꞌobꞌom lo la ojertan chaꞌ e kuꞌana na riꞌ.

29 »Ekꞌu woꞌora, Qaqaw, kil la ri xibꞌibꞌal kipa raj chakibꞌ la kiꞌanom; yaꞌa kꞌu la ri chuqꞌabꞌ la chike rike chaꞌ na kakixiꞌij ta kꞌana kibꞌ kakitzijoj ri Chꞌaꞌtem la. 30 Yaꞌa ri qꞌabꞌ la pakiwiꞌ chaꞌ chupa rubꞌiꞌ ri Jesús, ri Santowilaj Aj Chak la, kekunutaj ri yewaꞌibꞌ y kaꞌaniꞌ taq kꞌutubꞌal re ri chuqꞌabꞌ la» xechaꞌ.

31 Echiriꞌ xkikꞌis uꞌanik orar, ri luwar pa kimolom wi kibꞌ xbꞌarbꞌatik y konoje xkikꞌul ruchuqꞌabꞌ ri Santowilaj Ruxlabꞌixel ri Dios y jekꞌulaꞌ na kakixiꞌij ta kꞌana kibꞌ kakitzijoj Ruchꞌaꞌtem ri Dios chikiwach konoje ri winaq.

Ri kikojom rubꞌiꞌ ri Cristo kakitoꞌ kibꞌ rukꞌ rubꞌitaq ke

32 Konoje kꞌu rukꞌiyal hermanos, ri xkikoj rubꞌiꞌ ri Cristo, lik uꞌanom xa jun kanimaꞌ y xa jun kinaꞌoj; y na jinta junoq chike kuꞌan re che ri kꞌo rukꞌ, ma rubꞌitaq ke xuꞌan re chinima ronoje. 33 Jekꞌulaꞌ riꞌ, ri e taqoꞌn re ri Cristo rukꞌ unimal kichuqꞌabꞌ ketzijon chwi rukꞌastajibꞌal ri Qanimajawal Jesús, yey ri toꞌbꞌal re ri Dios kꞌo pakiwi konoje rike.

34 Na jinta kꞌu junoq kutij nibꞌaꞌil chikixoꞌl, ma janipa ri kꞌo taq kulew o kꞌo taq ja kukꞌ, we kꞌo xkikꞌayij, kakikꞌam lo ri rajil 35 y kakiya kꞌu pakiqꞌabꞌ ri e taqoꞌn re ri Jesús chaꞌ rike kakijach chikiwach ri hermanos e chirij taq ri kajawax wi chike chikijujunal.

36 Kꞌo kꞌu jun achi José rubꞌiꞌ, yey ri e taqoꞌn kakibꞌiꞌij Bernabé che. (Waꞌ wa bꞌiꞌaj keꞌelawi “bꞌochiꞌinel”.)‡“Bꞌochiꞌinel”: Xkoj wa bꞌiꞌaj che ri Bernabé, ma rire lik toꞌbꞌel che unimarisaxik kikꞌuꞌx ri hermanos. Rire aj Chipre y e kukꞌil ri ralkꞌoꞌal kan ri Leví. 37 Waꞌ waꞌchi xukꞌayij chꞌaqap rulew; tekꞌuchiriꞌ, xukꞌam lo ri rajil y xuya pakiqꞌabꞌ ri e taqoꞌn.

<- Hechos 3 Hechos 5 ->