Rukaꞌm carta xutzꞌibꞌaj ri Pablo che ri Timoteo

1 Riꞌin in Pablo, in taqoꞌn re ri Qanimajawal Jesucristo ma e xraj riꞌ ri Dios chwe kantzijoj ri kꞌaslemal bꞌiꞌtisim chike ri kakiya kibꞌ puqꞌabꞌ ri Qanimajawal Jesucristo. 2 Kantzꞌibꞌaj pan waꞌ wa carta chawe riꞌat Timoteo. Riꞌin lik kꞌax katinnaꞌo ma at pachaꞌ nukꞌajol chupa rubꞌiꞌ ri Cristo. Chakꞌulu kꞌu ri unimal rutzil kꞌuꞌxaj, ri relej kꞌuꞌxaj y ri utzil chomal re ri Qaqaw Dios y re ri Qanimajawal Jesucristo.

3 Lik kintioxin chwach ri Dios, ri kanloqꞌnimaj jelaꞌ pachaꞌ xkiꞌan lo ri watiꞌ-numam ojertan yey lik kunaꞌ nukꞌuꞌx utz nuꞌanom chwach Rire. Yey echiriꞌ kanꞌan orar chipaqꞌij chichaqꞌabꞌ xaqi katkꞌun chinukꞌuꞌx. 4 E kakꞌun chinukꞌuꞌx roqꞌej xaꞌano echiriꞌ xatkanaj kanoq y lik kuaj kꞌut kanwil awach chaꞌ jelaꞌ kakiꞌkot ri wanimaꞌ. 5 Yey kakꞌun chinukꞌuꞌx ri saqil kubꞌulibꞌal akꞌuꞌx rukꞌ ri Qanimajawal Jesucristo; ma waꞌ nabꞌe xkꞌojiꞌ rukꞌ rawatiꞌ Loida y rachu Eunice, y woꞌora lik qꞌalaj e ne kꞌo awukꞌ riꞌat.

6 E uwariꞌche lik katimpixabꞌaj puwi ri uyaꞌom ri Dios chawe,*1 Co. 12:4-11 waꞌ e ri xakꞌulu echiriꞌ xinya ri nuqꞌabꞌ pawiꞌ chaꞌ katuꞌan at aj chak re ri Dios. Lik kꞌu chachuqꞌubꞌej awibꞌ che uꞌanik waꞌ rukꞌ ronoje akꞌuꞌx. 7 Ma ri Dios na uyaꞌom ta ri Ruxlabꞌixel chiqe chaꞌ kojuꞌan oj turun; e uyaꞌom chiqe chaꞌ kakꞌojiꞌ qachuqꞌabꞌ, rutzil qakꞌuꞌx y saqil qanaꞌoj. 8 E uwariꞌche, matkꞌix che utzijoxik ri Utzilaj Tzij re ri Qanimajawal Jesucristo y matkꞌix ne chwe riꞌin ma in kꞌo pa cárcel ruma kantzijoj ri Utzilaj Tzij. Ekꞌu riꞌat, e chakuyu taq ri kꞌaxkꞌobꞌik kape paqawiꞌ ruma rutzijoxik waꞌ, chachꞌija kꞌu ronoje rukꞌ ruchuqꞌabꞌ ri Dios.

9 E ri Dios xkolobꞌen qeꞌoj y xojusikꞌij chaꞌ kojkꞌojiꞌ jusukꞌ chwach; yey waꞌ na e ta ruma ri qaꞌanom riꞌoj, ma e ruma lik e xraj riꞌ Rire chiqe. Echiriꞌ kꞌamajaꞌ ne kuꞌan ruwachulew, uchꞌobꞌom chik kuya ri unimal rutzil ukꞌuꞌx chiqe ruma ri Qanimajawal Jesucristo. 10 Y woꞌora ukꞌutum chi ri rutzil ukꞌuꞌx chiqe ma xutaq lo ri Qanimajawal Jesucristo re kojukolobꞌej. Rire xuchꞌij uchuqꞌabꞌ ri kamik y jekꞌulaꞌ xuqꞌalajisaj kꞌo kꞌaslemal na jinta utaqexik chike ri kikojom ri Utzilaj Tzij.

11 Yey riꞌin in chaꞌtal lo ruma ri Dios re kantzijoj wa Utzilaj Tzij y re kinuꞌan in taqoꞌn y kꞌutunel chikiwach ri ukꞌiyal kiwach taq ri tikawex. 12 E uwariꞌche riꞌin kantij ronoje taq wa kꞌaxkꞌobꞌik in kꞌo wi y na kinkꞌix ta kꞌu che, ma lik wetaꞌam china rukꞌ kubꞌul wi nukꞌuꞌx, yey lik jikil nukꞌuꞌx che e Rire lik kꞌo uchuqꞌabꞌ che uchajixik ri uyaꞌom panuqꞌabꞌ kꞌa che rukꞌunibꞌal ri Cristo.

13 E lik chakꞌutu chikiwach ri tikawex ri saqil kꞌutunik atom riꞌat chwe; chaꞌana waꞌ rukꞌ ri kubꞌulibꞌal kꞌuꞌxaj y ri rutzil kꞌuꞌxaj ariqom rukꞌ ri Qanimajawal Jesucristo. 14 Rukꞌ rutoꞌbꞌal ri Santowilaj Ruxlabꞌixel ri Dios kꞌo pa qanimaꞌ, lik chachajij chi utz ri yaꞌtal chawe ruma ri Dios.

15 Riꞌat lik awetaꞌam, e kꞌi ri qachbꞌiꞌil e aj Asia xinkoqꞌotaj kanoq, y chikixoꞌl rike kꞌo ri Figelo y ri Hermógenes. 16 Noꞌj ri Onesíforo na xinroqꞌotaj taj. Chukꞌutu kꞌu ri Qanimajawal Jesucristo ri rutzil ukꞌuꞌx che rire y chike taq ri e kꞌo pa rocho, ma rire ukꞌiyal laj xubꞌochiꞌij nukꞌuꞌx y na xkꞌix ta chwe tobꞌ in kꞌo pa karena chupa ri cárcel. 17 Y echiriꞌ xkꞌun wara Roma, lik xok il che nutzukuxik pa in kꞌo wi y xinuriqo. 18 Yey awetaꞌam ne riꞌat, rire lik xojutoꞌo echiriꞌ oj kꞌo chupa ri tinamit Éfeso. E uwariꞌche kantzꞌonoj che ri Qanimajawal chuyaꞌa ri rajil ukꞌaxel che ri Onesíforo chupa ri kꞌisbꞌal qꞌij.

2 Timoteo 2 ->