Kambꞌiꞌij kꞌu che alaq: E uqꞌijol waꞌ echiriꞌ ri Dios kubꞌiꞌtisij rutoꞌbꞌal; woꞌora e qꞌij re kolobꞌetajik chike ri tikawex.

3 Kaqachajij kꞌu qibꞌ chi utz che ri kaqaꞌano chaꞌ na oj ta latzꞌanel chike jujun chik y jelaꞌ na jinta junoq kakꞌaqaw bꞌi uqꞌij ruchak ri Dios kaqaꞌano. 4 Rukꞌ ronoje ri kaqaꞌano e kaqakꞌutu oj aj chak re ri Dios. Kaqakuy kꞌu ronoje rukꞌ unimal qakꞌuꞌx, tobꞌ oj kꞌo pa kꞌax, pa nibꞌaꞌil o pa bꞌis; 5 tobꞌ kabꞌalakꞌux qapa o kojkꞌam bꞌi pa cárcel, tobꞌ kakiyak kibꞌ rukꞌiyal winaq chiqij; tobꞌ kaqatij kꞌaxlaj chak, kaqakuy waram o kaqatij numik.

6 Yey kaqakꞌutu oj aj chak re ri Dios ma chom ri qabꞌinik, kꞌo runaꞌoj ri Dios qukꞌ, kꞌo unimal qakꞌuꞌx y kꞌaxnaꞌbꞌal qakꞌuꞌx, kꞌo ri Santowilaj Ruxlabꞌixel ri Dios qukꞌ y kꞌax keqanaꞌ konoje rukꞌ ronoje qakꞌuꞌx.

7 Kaqꞌalajinik oj aj chak re ri Dios ma kaqatzijoj ri saqil kꞌutunik, kꞌo ruchuqꞌabꞌ ri Dios qukꞌ y kaqaꞌan ri lik usukꞌ y jekꞌulaꞌ kaqachꞌij kichuqꞌabꞌ konoje ri keyaktaj chiqij.[a]

8 Qakꞌulum yakbꞌal qaqꞌij y kꞌaqibꞌal bꞌi qaqꞌij; e kꞌo ri chom kechꞌaꞌt chiqij y e kꞌo ri tzel kechꞌaꞌt chiqij. Kabꞌiꞌx chiqe oj aj raqꞌul, tobꞌ na jinta raqꞌubꞌal kaqaꞌano. 9 Tobꞌ e kꞌi ketaꞌam oj aj chak re ri Dios; na rukꞌ ta kꞌu riꞌ, e kꞌo jujun kakiꞌan pachaꞌ na ketaꞌam ta waꞌ. Xtewun ne ri kamik paqawiꞌ; na rukꞌ ta kꞌu riꞌ, kꞌa oj kꞌaslik. Tobꞌ lik xojyaꞌ pa kꞌax, pero na oj kaminaq taj. 10 Kꞌo qꞌij oj yaꞌom pa bꞌis; na rukꞌ ta kꞌu riꞌ, xaqi kojkiꞌkotik. Na oj ta bꞌeyom; na rukꞌ ta kꞌu riꞌ, qayaꞌom rubꞌeyomalil ri Dios chike ukꞌiyal tikawex. Wara che ruwachulew na jinta kꞌo qukꞌ; na rukꞌ ta kꞌu riꞌ, e ri Dios uyaꞌom ronoje ri kajawax chiqe.

11 Alaq qa hermanos aj Corinto, ronoje xqaqꞌalajisaj lo chiwach alaq, na jinta kꞌana xqewaj chiwach alaq. Lik qakꞌutum che alaq ri kꞌaxnaꞌbꞌal qakꞌuꞌx kꞌo pa qanimaꞌ. 12 Etaꞌam alaq riꞌoj lik qakꞌutum ri rutzil qakꞌuꞌx che alaq, noꞌj ralaq na je ta laꞌ kaꞌan alaq chiqe riꞌoj. 13 Ekꞌu woꞌora kinchꞌaꞌt ukꞌ alaq pachaꞌ alaq walkꞌoꞌal: Jelaꞌ pachaꞌ riꞌoj lik qakꞌutum ri rutzil qakꞌuꞌx che ralaq, jekꞌulaꞌ ꞌana alaq chiqe riꞌoj.

14 Hermanos, makꞌulaj ibꞌ alaq kukꞌ ri na kikojom ta rubꞌiꞌ ri Cristo, ma ri jusukꞌ na kukꞌulaj ta ribꞌ rukꞌ ri na jusukꞌ taj y ri qꞌijsaq na kukꞌulaj ta ribꞌ rukꞌ ri qꞌequꞌm. 15 ¿Yey ri Cristo rukꞌ ri Belial[b] kꞌo nawi utzil chikiwach? ¿O saꞌ ri utz kuriq junoq ukojom rubꞌiꞌ ri Cristo che junoq na ukojom taj? 16 Ri rocho ri Dios na kukꞌulaj ta ribꞌ rukꞌ taq ri tiox. Jekꞌuriꞌlaꞌ ralaq na jinta chi e alaq kukꞌ ri tiox, ma ralaq alaq rocho ri Dios kꞌaslik. E pachaꞌ rubꞌiꞌim Rire: