1 Chinkuyu kꞌana alaq we kinchꞌaꞌt kꞌenoq pachaꞌ junoq chꞌuꞌjerinaq. 2 Kanꞌan kꞌu waꞌ ma lik kꞌax kannaꞌ alaq, yey wa kꞌaxnaꞌbꞌal nukꞌuꞌx che alaq e ri Dios kojoyom pa wanimaꞌ. Ma riꞌin nuyaꞌom alaq puqꞌabꞌ ri Cristo y xew puqꞌabꞌ Rire kuaj kꞌo alaq. E pachaꞌ juna achi echiriꞌ kuya rumiꞌal puqꞌabꞌ juna ala pa kꞌulanikil. Ri karaj rachi e kuya puqꞌabꞌ rala jun saqil qꞌapoj ali. Jekꞌulaꞌ ri kuaj riꞌin che ralaq e na jinta kꞌana chꞌul che alaq chwach ri Cristo. 3 Lik kubꞌisoj nukꞌuꞌx ma kꞌaxtaj kakꞌulumaj e alaq jelaꞌ pachaꞌ ri xukꞌulumaj ri Eva ojertan echiriꞌ xsokotaj ruma ri tzel unoꞌjibꞌal ri kumatz. Ma kꞌaxtaj kajalkꞌataj ri naꞌoj alaq, kesaj kꞌu ibꞌ alaq puqꞌabꞌ ri Cristo y na kataqej ta chi alaq rukꞌ ronoje kꞌuꞌx alaq. 4 Kambꞌiꞌij waꞌ ma echiriꞌ kopon junoq ukꞌ alaq, tobꞌ junwi ri tzijonik kuꞌan puwi ri Jesús chwach ri tzijonik qaꞌanom riꞌoj che alaq, ¡lik kakꞌul kꞌu alaq riꞌ! Y kakꞌul ne alaq ri petinaq rukꞌ juna chik uxlabꞌixel, tobꞌ na e ta ri Ruxlabꞌixel ri Dios kꞌulum chi alaq. Kakꞌul ne alaq jun chik tzij, tobꞌ junwi chwach ri Utzilaj Tzij kojom chi alaq.

5 Kꞌo ri kakibꞌiꞌij e nimaq taq taqoꞌn yey kakitakꞌabꞌaꞌ kiqꞌij. ¿Kꞌo nebꞌa más kiwach rike chinuwa riꞌin? Kanchꞌobꞌ riꞌin, na jintaj. 6 Ma tobꞌ na kinchꞌaꞌt ta riꞌin rukꞌ nimaq taq chꞌaꞌtem pachaꞌ ri kakiꞌan rike, pero riꞌin más kꞌo wetaꞌam chikiwa rike; y waꞌ nukꞌutum chiwach alaq rukꞌ ronoje ri nuꞌanom chixoꞌlibꞌal alaq.

7 Laj kꞌo ri kakichꞌobꞌ raqan na jinta nuwach; ma echiriꞌ xintzijoj ri Utzilaj Tzij re ri Dios che alaq, na xintzꞌonoj tane kꞌana rajil ri nuchak. ¿Kꞌo nebꞌa numak riꞌ chiwach alaq ruma waꞌ? Ma we xinꞌan chꞌutiꞌn che wibꞌ, e chaꞌ kanimarisax qꞌij ralaq chwach ri Dios. 8 Echiriꞌ riꞌin xinkꞌojiꞌ ukꞌ alaq, e jujun chik iglesias ri xkitaq lo puaq chwe. Ekꞌu xinkꞌam puaq chike rike chaꞌ utz xinqꞌalajisaj ri Utzilaj Tzij chiwach ralaq. 9 Ma echiriꞌ in kꞌo ukꞌ alaq yey kꞌo kꞌu xajawax chwe, na jinta xintzꞌonoj che ralaq. Ri xetoꞌw we e ri hermanos e petinaq Macedonia. Na jinta kꞌu xinkꞌam che ralaq ma na xuaj taj xinya alkꞌayew che alaq y na kuaj tane kanꞌan waꞌ chiqawach apanoq. 10 Yey paqatzij wi ri Qꞌijsaq re ri Cristo pa wanimaꞌ kꞌo wi; ruma kꞌu riꞌ kanjikibꞌaꞌ uwach waꞌ: E na jinta junoq chilaꞌ Acaya kesan re ri kiꞌkotemal kannaꞌo ruma na kanya ta alkꞌayew che alaq. 11 Chiwach ralaq, ¿saꞌ nawi ubꞌe na kantzꞌonoj ta wajil che alaq? ¿Ruma nawi na kꞌax ta kannaꞌ alaq? Na e ta riꞌ, ma ri Dios lik retaꞌam saꞌ ri kꞌo pa wanimaꞌ.

12 Ekꞌu ri na kantzꞌonoj ta wajil che alaq, na kanwoqꞌotaj ta uꞌanik chaꞌ jelaꞌ kaqꞌalajinik na junam ta kojchakun riꞌoj pachaꞌ ri jujun chik, ri kakijunimaj ri kichak rukꞌ ri qachak riꞌoj xa re yakbꞌal kiqꞌij. 13 Rike xa e sokosoꞌnel, na e ta saqil taqoꞌn ma kiꞌanom che kibꞌ pachaꞌ e taqoꞌn re ri Cristo. 14 Makam kꞌu animaꞌ alaq che waꞌ; ma jenelaꞌ kuꞌan ri Satanás, kuꞌan che ribꞌ pachaꞌ e jun ángel re Qꞌijsaq. 15 E uwariꞌche makam animaꞌ alaq che we ri e aj chak re ri itzel winaq kakiꞌan che kibꞌ pachaꞌ e ꞌanal re ri jusukꞌ. Pero kopon kꞌu ri qꞌij echiriꞌ kakikꞌul na ri tojbꞌal re ri na utz taj kiꞌanom.

16 Jumul chik kambꞌiꞌij: Machꞌobꞌ alaq we riꞌin xinchꞌuꞌjerik. Yey we kꞌo junoq che alaq jelaꞌ kuchꞌobꞌo, chuyaꞌa luwar chwe kantakꞌabꞌaꞌ kꞌana nuqꞌij pachaꞌ junoq chꞌuꞌjerinaq. 17 Ri kaqatakꞌabꞌaꞌ qaqꞌij na e ta ukꞌutuꞌn ri Qanimajawal chiqe; pero kantakꞌabꞌaꞌ kꞌana nuqꞌij pachaꞌ junoq na jusukꞌ ta runaꞌoj. 18 Lik e kꞌi ri kakitakꞌabꞌaꞌ kiqꞌij ruma ri kakiꞌan che ruwachulew, yey woꞌora kanꞌan kꞌana we riꞌin. 19 Ralaq lik kꞌo naꞌoj alaq; na rukꞌ ta kꞌu riꞌ, lik kekꞌul alaq ri sachinaq kinaꞌoj. 20 E kuyum kꞌu alaq riꞌ rike tobꞌ lik ketaqan pawiꞌ alaq, kakichap ri e alaq y kakikꞌis ne rubꞌitaq e alaq, yey lik kakiꞌan nim che kibꞌ chiwach alaq. ¡Kuyum ne alaq tobꞌ kakipachꞌ qꞌabꞌ chipalaj alaq! Ronoje waꞌ kuyum alaq y na jinta kabꞌiꞌij alaq che. 21 Laj kꞌixbꞌal kꞌu chwe riꞌin ma na xinchꞌij ta uꞌanik pachaꞌ ri kakiꞌan rike.

Pero we rike na kekꞌix ta che kakitakꞌabꞌaꞌ kiqꞌij, jekꞌulaꞌ riꞌ kanꞌan riꞌin, tobꞌ rukꞌ waꞌ pachaꞌ in chꞌuꞌjerinaq. 22 Rike kakitakꞌabꞌaꞌ kiqꞌij ma e aj hebreo; jelaꞌ riꞌin, in aj hebreo yey kanriq ri chꞌaꞌtem hebreo. Rike kakiꞌan nim che kibꞌ ma e kukꞌil ri tinamit re Israel, jelaꞌ riꞌin in kukꞌil ri tinamit re Israel. Rike kakiyak kiqꞌij ma e ralkꞌoꞌal kan ri Abraham; jelaꞌ riꞌin, in ralkꞌoꞌal kan ri Abraham. 23 Rike kakibꞌiꞌij e aj chak re ri Cristo, jelaꞌ riꞌin paqatzij wi in aj chak re ri Cristo yey más nim ri chak nuꞌanom riꞌin chikiwa rike. Tobꞌ kinchꞌaꞌt pachaꞌ in chꞌuꞌjerinaq, kambꞌiꞌij kꞌu waꞌ: Riꞌin más in chakuninaq y más nutijom kꞌax chikiwach rike. Ma ukꞌiyal laj bꞌalakꞌum nupa, ukꞌiyal laj inyaꞌom pa cárcel, ukꞌiyal laj xtewun ri kamik panuwiꞌ. 24 Raj judiꞌabꞌ woꞌobꞌ laj xkijichꞌ nupa pa treinta y nueve asial.*Dt. 25:3 25 Yey oxibꞌ laj in ꞌanom pa bꞌarijon, julaj in ꞌanom paꞌbꞌaj.*Hch. 14:19 Oxlaj ya laj in jiqꞌinaq pa yaꞌ ruma xmuqutaj ri barco in kꞌo chupa, yey xinchꞌij ne jun aqꞌabꞌ rukꞌ jun qꞌij in kꞌo chwi ri mar. 26 Ukꞌiyal laj nuꞌanom unimal bꞌe. Ya laj in jiqꞌinaq pa taq nimayaꞌ. Ya laj in kaminaq pakiqꞌabꞌ eleqꞌomabꞌ y pakiqꞌabꞌ ri na e ta kukꞌil ri nutinamit. Ya laj inkamisam kuma ne ri watz-nuchaqꞌ. Ya laj inkamisam pa taq tinamit, pa taq luwar katzꞌintzꞌotik y chwi ri mar. Ya laj ne inkamisam kuma ri kakibꞌiꞌij kubꞌul kikꞌuꞌx rukꞌ ri Cristo, tobꞌ waꞌ na qatzij taj. 27 Nutijom kꞌaxlaj chak y kosik. Ukꞌiyal laj nukuyum waram, numik y tzajin chiꞌ. Ruma taq ri lik kꞌo kanꞌano, ukꞌiyal laj na utz ta chi ne xinwaꞌik. Nutijom kꞌaxkꞌolil tew y xinkanajik na jinta chi ne nuqꞌuꞌ. 28 Y xaqi uwi chi waꞌ, ri jujun qꞌij lik saꞌchi rubꞌis nukꞌuꞌx kuma taq riglesias; e kannaꞌ riꞌin waꞌ e pachaꞌ jun eqaꞌn kꞌo panuwiꞌ. 29 We kꞌo junoq kꞌo pa kꞌax y na jinta uchuqꞌabꞌ, e kannaꞌ riꞌin pachaꞌ in ri inkꞌulumayom re waꞌ. We kꞌo junoq kumin junoq chik pa ri mak, waꞌ kuya woyowal.

30 We chirajawaxik kꞌut kanyak nuqꞌij, ri takꞌabꞌal nuqꞌij kanꞌano e kantzijoj taq ri kuqꞌalajisaj, riꞌin na jinta nuchuqꞌabꞌ. 31 Ekꞌu ri Dios, Ruqaw ri Qanimajawal Jesucristo ri na jinta utaqexik nim uqꞌij, e etaꞌmayom re na raqꞌubꞌal ta wa kambꞌiꞌij. 32 Tape kꞌu alaq ri xinkꞌulumaj Damasco: Ri aj wach kꞌo chwach ri rey Aretas xtaqan che kikojik e aj chajal re ri tinamit chaꞌ kinkichapo. 33 Yey ruma kꞌu riꞌ xinqasax lo chupa jun nimalaj chakach, ximom lo rukꞌ lazo chwi jun nimalaj tapia kꞌo ventana che.

<- 2 Corintios 102 Corintios 12 ->