1 E junoq kukojo ri Jesús e Uchaꞌoꞌn lo ri Dios, riꞌ alaxinaq chi chupa rubꞌiꞌ ri Dios. Yey we kꞌax kaqanaꞌ ri Dios, riꞌ kꞌax keqanaꞌ ri e ralkꞌoꞌal Rire. 2 Chwi kꞌu riꞌ waꞌ kaqetaꞌmaj kꞌax keqanaꞌ ri e ralkꞌoꞌal ri Dios, we kꞌax kaqanaꞌ ri Dios y kojtajin che uꞌanik ri kubꞌiꞌij Rutzij Upixabꞌ. 3 Ma ri kꞌutubꞌal re ri rutzil qakꞌuꞌx che ri Dios, e ri kaqaꞌan janipa ri kubꞌiꞌij Rutzij Upixabꞌ yey waꞌ na kꞌayew taj kaꞌanik. 4 Ma qonoje ri oj alaxinaq chi chupa rubꞌiꞌ ri Dios, kaqachꞌij uchuqꞌabꞌ ri na utz taj kꞌo che ruwachulew, yey kaqaꞌan waꞌ ruma ri kubꞌulibꞌal qakꞌuꞌx rukꞌ Rire. 5 ¿China kꞌu ri kachꞌijow uchuqꞌabꞌ ri na utz taj kꞌo che ruwachulew? E junoq kukojo ri Jesús e Ukꞌajol ri Dios.

6 Ri Qanimajawal Jesucristo xkꞌun che ruwachulew y xqꞌalajin kꞌut china Rire echiriꞌ xukꞌul ri yaꞌ re bautismo*Mt. 3:16 y echiriꞌ xturuw rukikꞌel; na xew ta kꞌu ruma ri bautismo rukꞌ yaꞌ ma rukꞌ ne rukikꞌel xturuwik. Ekꞌu ri Ruxlabꞌixel ri Dios xqꞌalajisan re waꞌ; yey ronoje ri kubꞌiꞌij Rire, lik qatzij. 7 E oxibꞌ kꞌu ri keqꞌalajisan puwi ri lik qatzij:*Pa ri versículo 7 y jeqebꞌal re ri versículo 8, kꞌo jujun manuscritos kakibꞌiꞌij: «E oxibꞌ kꞌu ri e kꞌo chilaꞌ chikaj keqꞌalajisan puwi ri lik qatzij: Ri Qaqaw Dios, ri Tzij y ri Ruxlabꞌixel ri Dios. Koxchal kꞌu riꞌ waꞌ xa jun kiꞌanom. Yey e oxibꞌ ri keqꞌalajisan puwi ri lik qatzij wara che ruwachulew.» 8 ri Ruxlabꞌixel ri Dios, ri bautismo re ri Jesús rukꞌ yaꞌ y rukikꞌel ri Jesús xturuw chwa ri cruz; yey uroxchal waꞌ junam ri kakiqꞌalajisaj.

9 Riꞌoj kaqakꞌul ri kakiqꞌalajisaj ri tikawex, pero janipa ri kubꞌiꞌij ri Dios más kꞌo uwach chwa ri kakibꞌiꞌij ri tikawex; ruma kꞌu riꞌ lik chirajawaxik kaqakꞌul janipa ri kuqꞌalajisaj Rire puwi Rukꞌajol. 10 E junoq kubꞌul ukꞌuꞌx rukꞌ Rukꞌajol ri Dios, riꞌ ukojom janipa ri uqꞌalajisam ri Dios puwi Rukꞌajol. Noꞌj ri na kukoj ta ri kubꞌiꞌij ri Dios, e pachaꞌ kuꞌan aj raqꞌul che ri Dios, ma na kukoj ta ri uqꞌalajisam ri Dios puwi Rukꞌajol. 11 Y ri qꞌalajisam e waꞌ: Ri Dios uyaꞌom qakꞌaslemal na jinta utaqexik, yey waꞌ wa kꞌaslemal xew kariqitaj ruma Rukꞌajol. 12 E junoq ukꞌulum Rukꞌajol ri Dios pa ranimaꞌ, riꞌ yaꞌtal chi waꞌ wa kꞌaslemal che; noꞌj e junoq na ukꞌulum ta Rukꞌajol ri Dios pa ranimaꞌ, riꞌ na yaꞌtal ta waꞌ wa kꞌaslemal che. 13 Kantzꞌibꞌaj pan waꞌ che alaq ri kojom alaq rubꞌiꞌ Rukꞌajol ri Dios, chaꞌ ketaꞌmaj alaq kꞌo kꞌaslemal alaq na jinta utaqexik.

14 Kubꞌul qakꞌuꞌx rukꞌ ri Dios ma qetaꞌam we ri kaqatzꞌonoj che e chirij janipa ri karaj Rire, kojuta kꞌu riꞌ. 15 Yey we qetaꞌam Rire kojuto, qetaꞌam kꞌu riꞌ kuya chiqe saꞌ ri qatzꞌonom che.

16 We kꞌo junoq karil juna hermano katzaq pa mak, yey we waꞌ wa mak na kukꞌam tubꞌi pa ri kamik chwach ri Dios,*1 Jn. 2:22; 4:3; Mt. 12:31-32; Heb. 6:4-6 chuꞌana kꞌu orar riꞌ chaꞌ wa hermano kutzelej utzij chwach ri Dios y jekꞌulaꞌ ri Dios kuya ukꞌaslemal. Waꞌ e we ri mak na kukꞌam tubꞌi pa ri kamik chwach ri Dios. Pero kꞌo mak kukꞌam bꞌi jun pa ri kamik chwach ri Dios;†“Mak kukꞌam bꞌi jun pa ri kamik chwach ri Dios”: Waꞌ e keꞌelawi, ri mak más nim e we jun na karaj taj kukoj rubꞌiꞌ ri Cristo, ma ri kaꞌanaw re waꞌ na jinta ukꞌaslemal chwach ri Dios. chwi kꞌu riꞌ waꞌ na kambꞌiꞌij taj we kꞌa kaꞌan orar puwi ri kaꞌanaw re. 17 Ronoje ri na jusukꞌ taj kaꞌanik e mak chwach ri Dios, pero kꞌo mak na kukꞌam tubꞌi jun pa ri kamik na jinta utaqexik.

18 Qetaꞌam kꞌut, e janipa ri ebꞌalaxinaq chupa rubꞌiꞌ ri Dios, na kakitijoj ta chi kibꞌ che uꞌanik ri mak; ma Rukꞌajol ri Dios e kachajin ke chaꞌ na ketzaq ta puqꞌabꞌ ritzel winaq. 19 Lik kꞌu qetaꞌam oj re ri Dios, y qetaꞌam taq ri winaq re ruwachulew puqꞌabꞌ ritzel winaq e kꞌo wi. 20 Y qetaꞌam kꞌut, Rukꞌajol ri Dios xkꞌun che ruwachulew, yey uyaꞌom qanaꞌoj chaꞌ kaqetaꞌmaj uwach ri Jun paqatzij wi e Dios. Y oj kꞌo kꞌu puqꞌabꞌ ri paqatzij wi e Dios, ma oj kꞌo puqꞌabꞌ Rukꞌajol Jesucristo. Xew Rire paqatzij wi e Dios y e Rire ri kuya ri kꞌaslemal na jinta utaqexik. 21 Alaq walkꞌoꞌal chupa rubꞌiꞌ ri Dios, maloqꞌnimaj alaq taq ri tiox. Amén.

<- 1 Juan 4