1 Corintios 13

Ri lik chirajawaxik wi e ri rutzil kꞌuꞌxaj

1 We ta e laꞌ riꞌin kanriq kinchꞌaꞌt pa ukꞌiyal chꞌaꞌtem ke ri tikawex y kanriq ne ri kichꞌaꞌtem ri ángeles yey na jinta ri rutzil ukꞌuꞌx ri Dios pa wanimaꞌ, riꞌ xa in pachaꞌ ri chꞌichꞌ kayojoyotik o ri chꞌichꞌ katzinowik.

2 We ta e laꞌ yaꞌtal chwe kanqꞌalajisaj runaꞌoj ri Dios chikiwach ri tikawex y kanmaj usukꞌ ronoje ri ewatal chikiwach jujun chik y kanmaj usukꞌ ronoje naꞌoj, y we ta lik kꞌo kubꞌulibꞌal nukꞌuꞌx rukꞌ ri Dios chaꞌ utz rukꞌ waꞌ kanjalkꞌatij ne kiluwar ri nimaq taq juyubꞌ, yey na jinta ri rutzil ukꞌuꞌx ri Dios pa wanimaꞌ, riꞌ na jinta kꞌana nuchak chwach ri Dios.

3 We ta e laꞌ kanjach chike ri nibꞌaꞌibꞌ ronoje ri bꞌitaq we y tobꞌ ne kanya wibꞌ re kimporoxik xa re takꞌabꞌal nuqꞌij, yey na jinta ri rutzil ukꞌuꞌx ri Dios pa wanimaꞌ, riꞌ na jinta kꞌana kutiqoj chwe.

4 We junoq kꞌo ri rutzil ukꞌuꞌx ri Dios pa ranimaꞌ,

riꞌ kꞌo unimal ukꞌuꞌx kukꞌ ri tikawex,

lik utz ukꞌuꞌx,

na kꞌax ta ukꞌuꞌx chirij junoq,

na kutakꞌabꞌaꞌ ta uqꞌij

y na kuꞌan ta nim che ribꞌ.

5 We junoq kꞌo ri rutzil ukꞌuꞌx ri Dios pa ranimaꞌ,

riꞌ na kuꞌan ta ri na taqal ta che.

Na xew ta kok il che ri kajawax che rire,

ma e ne kok il che ri kajawax chike ri jujun chik.

Na xa ta rukꞌ jutzꞌit kape royowal

y na kukꞌol ta oyowal pa ranimaꞌ.

6 We junoq kꞌo ri rutzil ukꞌuꞌx ri Dios pa ranimaꞌ,

riꞌ kubꞌisoj ri na jusukꞌ taj kaꞌanik

yey lik kakiꞌkot che ri jusukꞌ kaꞌanik.

7 We junoq kꞌo ri rutzil ukꞌuꞌx ri Dios pa ranimaꞌ,

riꞌ kuyul re ronoje,

lik kubꞌul ukꞌuꞌx rukꞌ ri Dios y kukꞌ ri jujun chik,

xaqi e royeꞌem ri utz

y kuchꞌij uchuqꞌabꞌ janipa ri kape puwiꞌ.

8 Ri rutzil kꞌuꞌxaj re ri Dios na kasach ta kꞌana uwach. Pero kopon ri qꞌij echiriꞌ na kayaꞌ ta chi che junoq kuqꞌalajisaj runaꞌoj ri Dios, na kayaꞌ ta chi ne che junoq kachꞌaꞌt pa jujun chik chꞌaꞌtem na umajom taj y na kayaꞌ ta chi ne che junoq kutzijoj ri uqꞌalajisam ri Dios che; ma ronoje waꞌ xa kakꞌisik.

9 Woꞌora na qetaꞌam ta ronoje y na kaqariq ta uqꞌalajisaxik ronoje runaꞌoj ri Dios. 10 Pero kopon na kꞌu ri qꞌij echiriꞌ ronoje katzꞌaqat uwach; ekꞌu riꞌ ri na tzꞌaqat taj, xa kakꞌisik. 11 Ma riꞌin echiriꞌ in kꞌoꞌm, ronoje ri kambꞌiꞌij, ri kanchꞌobꞌo y ri kanmaj usukꞌ e re juna kꞌoꞌm. Noꞌj echiriꞌ xinnimarik, xinya kan ri kanꞌan chi nuchꞌutiꞌnal.

12 Woꞌora e pachaꞌ kojtzuꞌn pa juna espejo sutzꞌ uwach; noꞌj kopon na ri qꞌij kaqil uwach ri Dios, kꞌa ekꞌuchiriꞌ kaqꞌalajin chiqawach ri kaqilo. Woꞌora na kaqꞌalajin ta ronoje chinuwach; noꞌj kꞌo kꞌu jun qꞌij echiriꞌ kaqꞌalajin ronoje chinuwach, jelaꞌ pachaꞌ ri Dios lik retaꞌam ronoje ri kꞌo pa wanimaꞌ.

13 Woꞌora chirajawaxik kakꞌojiꞌ kubꞌulibꞌal qakꞌuꞌx rukꞌ ri Dios tobꞌ kꞌamajaꞌ kaqil uwach, kaqoyꞌej rubꞌiꞌtisim kan ri Dios chiqe y kakꞌojiꞌ ri rutzil ukꞌuꞌx ri Dios pa qanimaꞌ. Chike kꞌu wa oxibꞌ, ri más kajawax chiqe e ri rutzil kꞌuꞌxaj.

<- 1 Corintios 12 1 Corintios 14 ->