Foruini Banabasini emuama Aikoniamu goiro anisi wake
1 Foruini Banabasini emuama Aikoniamu goiro ane fakike Du orounu sosiro amuisike Godinu wake bunawereroma weisi. Bunawereroma weisiro moi Du orouini Du me imusu orouini emuama i wake nauisake emenu imuka yaisina Godibairo oisa. 2 Eno uisaro Godinu wake nauke me Du orouma emuaini dino wake weisaro i imusu orouma ibai nauisake i Godinu wake naukeibisa orou ufiakane ararua uyaka. 3 Eno uisaro Foruini Banabasini emuama iro odo keuwere ibaada Yesunu irau unu koreka wake weibisi. Weibisiro Yesuma emua erieke emuabairo buna ukekaini ereka marie enaenari uisi. 4 I Aikoniamu goi orou emua emenu imuka demui daabaro ode dauisa. Ibake moi orou emuama i Du orounu wake nauisa. Nono moi orouma i afasoro orounu wake nauisa. 5 I imusu orouini Du orouini emua yawokeibisa orouini emuama i afasoro orou omama ufiakane weisaro Foruini Banabasini emuama ibai nauisi. 6-7 Nauisike i goi sabu meisike Raikonia orofa Risidaini Debe goiyairo emua iro anisi. Iro anisike i goiyaini i orofa goi goi iro anisike Yesunu wake weada eneiareibisi.
Foruini Banabasini emuama Risidaini Debe goiyairo anisi wake
8 Moi Risida goi mi danu umu daba mamiro enare fare me. Dawa danu amaema dori arima enare fare mero uwararo mane ibeibi. 9-10 Foruini Banabasini emua fakiro i mima Forunu wake nauiro Foruma i mi erenewaa ukaada i mi dawa wirofine imukakua eno we imuike daiwereroma eno wei, anu umuma uyare enaa wei. Eno weibaie i mi idua sabu uyarike enari. 11 Eno uiro i ku siane ibisa orouma ibai ekake emenu Raikonia wakeroma eno weisa, moi godi ba eme ari iyabairo farisaya eawe weisa. 12 Eno weisake emenu godi danu ibiye Dufada, danu ibiye Banabasinu moi ibi mamisa. Nono Foru dawae wake weeka mi ibake danu moi ibiye Makari mamisa. 13 I godi Dufada danu uwara i goi barunaro enare ibi. I Dufadanu uwararo ofereni odeka miye segina segina uike boromakau unama ofereni odifine uwara aisamero waure fari. 14-15 Waure fariro Foruini Banabasini emuama i wake nauisike imukada emenu wau ma gagane budebade uisike i oroubairo ane fakike eno weisi, anemebake eno ukaisa weisi? Eno weisike eno weisi, uwae godi mero uwae ba eme, ya ari enoya weisi. Irau wake wefune yabairo farisua weisi. I irau wakeye eno, i ba me godie mediaweke oweaweke i me ibene ibene ibeka Godibairo yanu imuka yaisina iro odiawe weisi. Eno weisike nono weisi, i ba Godima ureini dooini dawaraini eraerabusa yaisina ubu uia dawa mane imuawe weisi. 16 Adinami nauwaroma emema emenu arara aneme aneme ukeibisa weisi. Eno ukeibisaro Godima emenu sara merama ukeibisabai eraada me yawokeibiriea weisi. 17 Eraada yawokebe Dawa dino uke dauike emuabairo obi ureroma we odaiseibiro isareibia weisi. Obi isareibiro emenu uruna daiwere warakeibisaro rooro uekibisaya weisi. Eno weisike nono weisi, Godima eno ukeibike awoena enaenari ukaku ibake Danu mane eno uke ma boroo yarakuba Dawae ba Godi iwoka sinaisia weisi. 18 Eno weebe weebe meisiro i orouma emuabake ofereni odifisane ukeibisabai idua meisa.
19 Eno ukeibisiro moi Du orouma Anidiyokaini Aikoniamu goiyairoma Risida goi oroubairo fakake Foruini Banabasibake meo wayai wake emuabairo weisa. Eno weisake meomao wayai wake weibisaro Risida goi orouma i miyaibairo ararua sirieke oma mukake Foru siane uka. Siane ukaro dooro biruike ane isari. Biruike ane isariro wanaro ma youre ane goi barunaro oisa. Eno uisake dawa fearinua we imuisake ibake meisake anisa. 20 Meisake anisaro Yesunu umuro eneiareibisa orouma Foru enare kara uisaro Foru uyarike goiro owere ani. Owere ane ainike wai uriro uyarike iroma Banabasini Debe goiro ane faki.
Siria orofa Anidiyoka goiro oweka wake
21-22 Foruini Banabasini emuama i Debe goi oroubairo Godinu irau wake weisiro eme keuwere nauisake emenu imuka yaisina Godibairo oisa. Nono dubuenaro Debe goi meisike owekike Risida goini Aikoniamu goini Anidiyoka goiro Godinu wake naukeibisa oroubairo anisike Godinu wake eno weisi, Godibairo ibenewaa uawe weisi. Merama odo odo keuwere yabairo fafekuro enare ara ufoisaie dubuenaro Godinu yawokaku orofaro anifoisaya weisi. Eno weibisiro i Godinu wake naukeibisa orouma i wake nauisake buna daiwere uisa. 23 Ibake Foruini Banabasini emuama i sosi sosi yawokeka orou emuabairo we mune odiriekike guriguri ukaada eno weisi, Yesu, emua yawokenewaa uyana weisi. Eno weisike anisi.
24 Anisike Fisidia orofa ma bereisike Famufiria orofaro ane faki. 25 Ane fafike i Fega goiro fakike Godinu wake weisike nono meisike iroma anisi. Ane Adaria goiro isare anisi. 26 Anisike iro boudiro amuisike iroma i Siria orofa Anidiyoka goiro anisi. I Anidiyoka goiro adinaro Godima weiro i orouma Foruini Banabasini emua we mune oisake Godibairo emuabake guriguri uisaro anisike nono owere aare Anidiyoka goiro faki. 27 Fakike weisiro i Godinu wake naukeibisa orou yaisina i miyai emuabairo ane faka. Ane fakaro emuama eno weisi, Godima i imusu orounu imuka ma owere muneba i imusu orouma emenu naukeka Godibairo odaisaya weisike Godima emuabairo ukeibi ibai yaisina weisi. 28 Foruini Banabasini emuama Anidiyoka goiro i Godinu wake naukeibisa oroubairo odo keuwere emuaini ibeibisa.
