Link to home pageLanguagesLink to all Bible versions on this site
3
Maski atoin Yahudis anmuiꞌ hak he ntoup pusaak naꞌko Uisneno In rais manbaꞌan, naan ka nsoi nafetin sin fa msaꞌ
1 Karu on naan ate, atjair atoin Yahudis reꞌ maꞌheriꞌ te, in upan saaꞌ? Of oniꞌ hi mitenab mak, atoin Yahudis napein koꞌu nneis ma reko nneis, naꞌko atoin ka Yahudis fa. Batuur, aiꞌ kaah? 2 Batuur! Atjair atoin Yahudis, anmuiꞌ in upan anbi rasi mfaun. Esan reꞌ: ahunut, natuin Uisneno anfee mepu neu atoin Yahudis he nruun ma ntui ma mpanat narek-rekoꞌ In Kabin ma Prenat. 3 Onaim on mee? Of oniꞌ hi mitenab mak, Uisneno ka bisa nmoeꞌ natuin fa saaꞌ reꞌ In naꞌuab, natuin anmuiꞌ atoin Yahudis bian reꞌ ka npirsai Je fa. Batuur, aiꞌ kaah? 4 Ka neu fa, tua! Fin maski mansian ii ok-okeꞌ abitan pah-pinan ia aputa-kriut ein, mes Uisneno kuun naꞌuab namneo ma namnoon piut! Mimnau, fin matuꞌi et Suur Akninuꞌ anmatoom nok Uisneno In tuan am nak,
“Anmuiꞌ tuaf reꞌ nasaeb sanat am nak,
In ka nafeek fa rasi natai ma namnoon.
Mes sin of nahinin am nak,
saaꞌ reꞌ In naꞌuab ee naan, ro batuur on reꞌ naan.
In ro nꞌiis ma niis,
natuin In ro tebes ma ka bisa fa he naꞌuab ansaan.”✡Siit Pures-Boꞌis sin 51:4

5 Mes karu hit tmoꞌe tsaan, rasi naan naruruꞌ ma nakriraꞌ ntein neu mansian ii ok-okeꞌ mnak, saaꞌ reꞌ Uisneno nmoeꞌ je naan, ro batuur on reꞌ naan. Karu on naan, hit he tak saaꞌ? He tak, Uisneno nhukun kit ka natai ma namnoon fa, aiꞌ? (Fin anmuiꞌ tuaf bian naꞌuab on naan ate.) 6 Ka neu fa, tua! Uisneno ka nsaan fa karu In nhukun kit. Fin In nmuiꞌ hak he nhukun tuaf-tuaf reꞌ anmoꞌe nsanan nbin pah-pinan ia.

7 Onaim karu au aputa-kriut, naan naruruꞌ ma nakriraꞌ mnak, Uisneno In hukun naan, batuur. Karu au ukriraꞌ ma ururuꞌ ꞌrair In pinan ma krahan on naan, nansaaꞌ am es In naprikas au ꞌmonik, rarit nafeek au rasi mnak, saaꞌ reꞌ au ꞌmoeꞌ je naan, ansaan? 8 Kais on naan, tua! Fin karu hi he mituin tenab on naan, hi mituin tuaf reꞌ nak, “Maut he hit tmoeꞌ maufinu amfaun antein, maut he rais reko naꞌbaab ok amfaun amsaꞌ!” Tuaf reꞌ naꞌuab on reꞌ naan, ro tebes napein hukun. Mes anmuiꞌ tuaf reꞌ naꞌuab naꞌreꞌuf au kanak nak, au unoniꞌ tuaf-tuaf aꞌsaan on naan.

Ka tiit fa tuaf es, reꞌ neekn ee namneo ma namnoon, fin hit mansian ii atmoꞌe tsaan ok-okeꞌ
9 Onaim on mee? Hi mitenab hit atoin Yahudis es reꞌ reko nneis naꞌko atoin ka Yahudis fa? Kaah fa, tua! Fin au ururuꞌ ma ukriraꞌ ki ꞌak, ansuun tuaf ro nmoꞌe nsanan, maski in atoin Yahudis, aiꞌ ka atoin Yahudis fa. 10 Fin matuꞌi et Uisneno In Suur Akninuꞌ mnak,
“Ka nmuiꞌ fa tuaf reꞌ nmoin namneo ma namnoon piut.
Ro tebes! Ka tiit tiit fa tuaf meseꞌ msaꞌ!
11 Ka nmuiꞌ fa tuaf reꞌ nahiin batuur-batuur anmatoom nok Uisneno.
Ka tiit fa tuaf meseꞌ msaꞌ reꞌ naim ranan he nahiin Uisneno.
12 Sin arsin anbeon ma npenun nrarin naꞌkon sin aꞌmoink ein reꞌ namneon ma namnonon.
Rarit sin ka mapaek ein fa goen.
Ka tiit fa tuaf reꞌ naruruꞌ ma nakriraꞌ neek reko.
Ka tiit tiit fa meseꞌ msaꞌ!✡Siit Pures-Boꞌis sin 14:1-3, 53:1-3
13 Sin uabk ein, ro foo punuꞌ,
on reꞌ noup nitu reꞌ atoniꞌ nhain nafaniꞌ.
Sin feefk ein suma napoitan puta-kriu goah.
Sin uabk ein reꞌ npoin naꞌkon sin feefk ein,
on reꞌ kaun aan in raso.✡Siit Pures-Boꞌis sin 5:10, 140:4
14 Sin feefk ein suma nahini haa he naseuk ein,
ma naꞌuab naꞌreꞌuf he nneek menab atoniꞌ.
fin naan anpoin naꞌkon sin neek reuꞌf ein.✡Siit Pures-Boꞌis sin 10:7
15 Sin ka namtaun fa he nroor naꞌmaet atoniꞌ.
16 Sin nnaon neun bare mee-mee jah ate.
sin anmataisiub ein nbin naan,
ma nasusab atoniꞌ nok rasi humaꞌ-humaꞌ.
17 Sin iꞌmoink ein ka nmuꞌin fa rais mamut ma rameꞌ,
ma ka nmonin fa nok neek mamut.✡Naiꞌ Yesaya 59:7-8
18 Sin ka bisa naran ma ntahan naan fa sin tuak ein,
natuin sin ka nmuꞌin fa neek amtaus aꞌkreꞌo neun Uisneno msaꞌ.”✡Siit Pures-Boꞌis sin 36:2

19 Hit tahiin tak, Uisneno nfee In Atoran neu tuaf reꞌ ro he nmoin natuin Atoorn ein naan. Nok ranan naan, sin ka nmuꞌin fa rasi ꞌsukif saaꞌ-saaꞌ antein. Of ansuun-suun tuaf anbi pah-pinan ia, ro he nbaisenun nꞌanin Uisneno, he In nafeek sin rasin am nak, sin ansanan, aiꞌ kaah. 20 Es naan ate, ka tiit fa tuaf es, reꞌ bisa naꞌuab am nak, “Uisneno nmarak kau mnak, atoin neek amneꞌo ma amnonot, natuin au ꞌmoeꞌ utuin In Atoorn ein ok-okeꞌ.” Ka bisa fa, tua! Fin Uisneno In Atoran reꞌ naruruꞌ ma nakriraꞌ mnak, hit ar-arkit atmoꞌe tsaan.✡Siit Pures-Boꞌis sin 143:2, Galatia 2:16

Hit ro he tpirsai Usif Yesus feꞌ, naꞌ Uisneno nmarak kit nak hit neek amneot ma amnonot
21 Kais amkeuk anmatoom nok Uisneno In reon reꞌ naruruꞌ ma nakriraꞌ ranan he hit bisa tareko tfain tok Ne. Batuurn ii, hit bisa tareko tfain tok Ne, mes ka natuin fa hit tmoeꞌ tatuin In Atoran. Fin In Atoran naan, antui on naan, ma In mafefa kniunꞌ ein un-unuꞌ natonan anbi Uisneno In Suur Akninuꞌ on naan amsaꞌ. 22 Uisneno nmarak kit nak atoin neek amneot reꞌ he tareko tfain tok Ne, oras hit tpirsai teu Yesus Kristus. In ka npiir fa humaf, fin In nmoeꞌ on reꞌ naan neu tuaf ein ok-okeꞌ reꞌ anpirsain neun Usif Yesus on naan.✡Galatia 2:16

23 Fin areꞌ mansian ii ok-okeꞌ nmoꞌen sanat. Es naan ate, tuaf reꞌ nsobaꞌ he nareok on nok Uisneno, ka bisa ntean fa In tuꞌin reꞌ mapinaꞌ-makrahaꞌ. 24 Maski on naan amsaꞌ, mes Uisneno kuun es reꞌ naruruꞌ ma nakriraꞌ In nekan arekot, ma nafeek nak, hit ka tsaan fa goen antein. In ntoup kit on naan, natuin Yesus Kristus ansoi nafetin naan kit naꞌko hit sanat ma penu sin.

25-26 Uisneno naruruꞌ ma nakriraꞌ neu Usif Yesus he njair fuaꞌ-turuꞌ reꞌ natai nafaniꞌ kit ma nnoes nain hit sanat ma penu sin. Mes hit ro he tpirsai Je tak, In ntoup hit sapaaf anbi rais hukun. Onaim In nꞌopaꞌ ma nasaik In naaꞌ, ma nmate nsenuꞌ kit. Nok ranan naan, Uisneno naruruꞌ ma nakriraꞌ nak, saaꞌ reꞌ In nafeek ee naan, ro batuur. Unuꞌ te, In naran ma nsabaar maꞌtaniꞌ, rarit In npiir he nnikan nain sanat ma penu reꞌ atoniꞌ nmoꞌe nrair sin. Mes karu In ka nhukun fa tuaf reꞌ ansaan, In ka njair fa afeek rasi reꞌ natai ma namnoon. Onaim In nfei ranan, maut he Yesus Kristus bisa nasaah hit atoin asanat hit hukun. Oras ia, In naruruꞌ ma nakriraꞌ neu mansian ii ok-okeꞌ mnak, In nmoeꞌ rais reko piut. Rarit tuaf-tuaf reꞌ ansaan, reꞌ anpirsai neu Naiꞌ Yesus, In nafeek he nmarak sin, atoin neek amneot.

27 Onaim on mee? Of oniꞌ hi mitenab hi bisa mifeef, natuin Uisneno ntoupu nrair ki, aiꞌ? Ka bisa fa, tua! He naruruꞌ ki Atoran es he hi mireok om mok Uisneno, oo? Hi mitenab of Uisneno ntoup ki natuin hi mmoeꞌ rais reko, oo? Ka bisa fa, tua! Hit suma bisa taruruꞌ Atoran reꞌ nak, Uisneno ntoup kit natuin hit tpirsai Naiꞌ Yesus. On reꞌ naan, tua!

28 Es naan ate, oras ia hit tahiin on nai: atoniꞌ bisa narekon nok Uisneno natuin sin npirsai Je, ka natuin fa sin nmoꞌen natuin In Atoran.

29 Au he utaan on nai: Uisneno suma antoupu haa atoin Yahudis, aa oo, aiꞌ In ntoup bian amsaꞌ? Batuur! In ntoup mansian ii ok-okeꞌ!

30 Fin Uisneno, suma meesꞌ aah. Ma suma nmuiꞌ ranan meesꞌ aah he In ntoup kit mansian ii he bisa tareko tfain tok Ne. Es reꞌ, hit ro he tpirsai teu Kristus. Ranan reꞌ naan, anfei je neu atoin Yahudis ma ka Yahudis fa msaꞌ.✡Surat reꞌ Naretaꞌ Nafaniꞌ Raan Aꞌhonis 6:4, Galatia 3:20

31 Onaim au he utaan on nai: karu hit tpirsai Uisneno, reꞌ naan annoes nain In Atoorn, aa oo? Kaah fa, tua! Reꞌ batuurn ii, naan anmoeꞌ Atoran naan saah.

<- Roma 2Roma 4 ->