1-2 Yesus Kristus of ankoen On anfain neem neu pah-pinan, he naprenat on reꞌ usif. Et amonit ma amates of anhaken nbin In matan, he In nafeek sin rasin. Natuin rasi naan, anbi Uisneno ma Yesus Kristus Sin humak ma Sin matak, au ꞌtoit batuur-batuur ꞌeu ko, he mnao mutoon Uisneno In Kabin ma Prenat. Muꞌneen om piut! Kais mutenab mak, oras reko, aiꞌ kaah. Mukriraꞌ sin, sin sanat, mes mukain sin nok neek sabaar. Amhaꞌtain sin neek ein meik noniꞌ-taruꞌ amneot.

3 Fin of nokaꞌ-nmeu te, tuaf-tuaf ka nroim fa he nneen noniꞌ-taruꞌ amneot. Sin of naꞌbuaꞌ tunggurun reꞌ bisa naꞌuab ein natuin sin roimk ein, he nharineb sin oras sin nnenan. 4 Sin nkeeh natau sin ruik ein he ka natniin fa noniꞌ-taruꞌ amneot. Mes sin nneen neu rais retaꞌ ruum-ruum.

5 Maski on mee-on mee msaꞌ, ho neekm aan ro he natea. Maran ambi haꞌmuꞌit. Amnao mutoon Rais Reko, he tuaf-tuaf anpirsain neun Yesus Kristus. Amtuthae tuaf-tuaf nok neek marine, tar antea mepu naan namsoup. Kais ammepu stenaꞌ-stenaꞌ.

6 Anmatoom nok au tuak ii te, kais amfairoir kau, natuin au nuut ii he namsoup goen. Au on reꞌ oe nbi kraas, in natꞌoop am he oekꞌ een.[a] 7 On reꞌ mnaent ii te, au ꞌaen ma ꞌtea ꞌrair nok reko. Au utuin piut ꞌeu Yesus Kristus, ma ka ꞌteib ꞌiit fa ꞌeu mee-mee. 8 Oras ia, au ꞌpao-pao rais jes feꞌ. Es reꞌ, kraa-mnatuꞌ reꞌ Usiꞌ napaar ee neu sekau-sekau reꞌ in aꞌmoin ee namneo ma namnoon. Hit Usiꞌ naan, afeek rasi amneot. In ka npiir fa humaf. Antea in oors ate, In of annonaꞌ kau kraa mnatuꞌ naan. Ka neu au ꞌmees fa, mes sekau-sekau reꞌ anneek Ee, ma anpa-pao Goe he nkoen On anfain neem, sin napein akraa mnatuꞌ on naan amsaꞌ.

9 Tius! Reko te, uum amkius maan kau rabah feꞌ! 10 Oras ia, au ꞌmes-mees kuuk. Naiꞌ Kreskes annao nrair et propinsi Galatia. Ma naiꞌ Titus annao nrair et pah Dalmatia. Mes naiꞌ Demas nroim nanesib risan amreꞌut nbi pah-pinan ia, onaim in nnao nasaitan kau. In nnao et kota Tesalonika.[b] 11 Suma naiꞌ Lukas es reꞌ natua nok kau et ia. Maim maan naiꞌ Markus he nua ki iim buꞌ-buaꞌ. Natuin in bisa nturun ma nbaab kau nbi rasi humaꞌ-humaꞌ nbi ia.[c] 12 Au ꞌreek naiꞌ Tekikus nnao et kota Efesus.[d] 13 Karu ho uum ate, kais amnikan he mait meik maan kau au baur mainikin reꞌ au umaik ee et naiꞌ Karpus in umi, et kota Troas. Ma kais amnikan he mait meik au tuis ein naan, anneis-neis reꞌ au ꞌtui sin et pasu.[e]

14 Naiꞌ Aleksander, atuut noin moroꞌ naan, anmoeꞌ maufinu neu kau fani-fani. Maut he nmoeꞌ. Uisneno of es anbaras neu ne, natai nok in aꞌmoꞌen naan.[f] 15 Ho ro he mpaant om muꞌko atoniꞌ reꞌ naan, natuin natiꞌ te in nraban hit uabk ein.

16 Oras au ꞌhake ꞌbi afeek rasi he umneob au tuak, ka tiit tain fa tuaf es he nok kau. Sin arsin annaon nasaitan kau. Maut he on reꞌ naan. Maut he Uisneno nnikan nain sin saant ein. 17 Maski on naan amsaꞌ, mes Uisneno ka nasaitan kau fa. In nhaꞌtain kau, he au bisa unaob In Rais Reko, ma au ka ꞌkuran fa saaꞌ-saaꞌ. Au utoon ꞌeu atoin ein reꞌ ka Yahudis fa, he sin nneen niit Rais Reko naan. Ma Uisneno nafetin anrair kau naꞌko siraak koꞌu. 18 Ma In of nafetin kau naꞌko rais maufinun ok-okeꞌ. Ma In neik kau nok mamut, rarit nataam kau ꞌeu sonaf neno tunan. Anbi naan, In es reꞌ annaaꞌ aprenat.

Uisneno naan, apinat ma akrahat! Au ꞌpures uꞌnaeb Ee ka natfeek niit fa, tua! Amin.

19 Kais amnikan he mfee tabe ma haan buseet meu bi Priskila,[g] ma in mone, naiꞌ Akila. On naan amsaꞌ meu naiꞌ Onisiforus ma in nonot-asar sin ok-okeꞌ.[h] 20 Naiꞌ Erastus natua et kota Korintus. Neon goes ii, au ꞌnao usaitan naiꞌ Trofimus anbi kota Miletus, natuin oras naan in nameen maꞌfenaꞌ.[i] 21 Maim ranan he karu reko te, ho uum amtea main ia, oras mainiik ii ka ntaam fa feꞌ. Hit aok-bian abitan ia, esan reꞌ: naiꞌ Ebulus, naiꞌ Pudes, naiꞌ Linus, ma bi Klaudia, ansoun ein tabe ma haan buseet neu ki. On naan amsaꞌ, neu hit aok-bian Kristen bian sin.

22 Au ꞌharap ma ufneek he Uisneno nok ko piut-piut. Maut he In nakriraꞌ In nekan arekot neu ki arki.