1 Saaꞌ reꞌ biak ein naꞌuab sin naan batuur, nak, “Tuaf reꞌ he njair aꞌnaak jemaꞌat, in npiir naan kuun meup reok goes.” 2 Aꞌnaak jemaaꞌt ii, ro he tuaf reꞌ in kaan ee reko. In ro he naꞌkiꞌi nbi matsaos nok bifee meseꞌ. In ro he ntahan nahiin in tuan, in neekn ee ro natea, atoniꞌ anhormaat ee, antoup amnemat anbi in umi, ma nanoniꞌ nabeiꞌ tuaf bian. 3 Kais tua amauf raru, ma kais amabanat. Tuaf reꞌ batuur ii, es reꞌ: atoin neek maꞌnuraꞌ, naim nahiin rais haran nekaf, ma ka nsinmakan fa roit. 4 In ro he nꞌator nahiin in uim je nanan. In aanh ein ro he natniin ee ma nhormaat ee. 5 Fin karu in ka bisa nꞌator fa in uim je naan ee te, nok ranan mee he in bisa nꞌator Uisneno In jemaaꞌt ein?
6 Reko nneis ampiir maan tuaf reꞌ in tenab, moꞌet ma taos namnasi nbi Kristus. Kais misaeb ma minaib maan aꞌnaak jemaꞌat naꞌko tuaf reꞌ feꞌ natuin Usif Yesus; kais-kaisaꞌ in naꞌnaeb on. Kais-kaisaꞌ Uisneno nteeꞌ je, on reꞌ Uisneno nteeꞌ niut reuꞌf ein sin aꞌnaak koꞌu. 7 Karu hi he misaeb tuaf es he njair aꞌnaak jemaꞌat, maim tuaf reꞌ atoniꞌ bian reꞌ ka npirsai fa nhormaat ee msaꞌ. Nok ranan naan, in ka namaeb on fa. Ma niut reuꞌf ein sin aꞌnaak kouꞌ goe, ka bisa nakreo namouf goe fa.✡Naiꞌ Titus 1:6-9
Tuaf reꞌ he nturun aꞌnaak jemaꞌat
8 On naan amsaꞌ, neu tuaf reꞌ he nturun aꞌnaak jemaꞌat. Sin arsin reꞌ naan, ro he tuaf reꞌ kaan ee nfoo mein, tuaf reꞌ ka napoi nahiin fa, tuaf reꞌ ka nbukae fa raur mafu, ma kais tuaf reꞌ naah mateꞌ. 9 Sin neek ein ro he kniunꞌ ein, ma sin ro he nnaaꞌ naher-heran noniꞌ reꞌ Uisneno nfee je ma nakriir ee neu kit, too apirsait ein. 10 Amparikas sin aꞌmoink ein ma sin meupk ein rek-reko. Karu ka mipein fa sin saant ein ate, naꞌ mait sin anjarin tuaf reꞌ he nturun aꞌnaak jemaaꞌt ein.
12 Tuaf reꞌ he nturun aꞌnaak jemaaꞌt ein, ro he atoniꞌ reꞌ naꞌkiiꞌ naheer anbi matsaos nok bifee meseꞌ. In ro he nꞌator nahiin in uim je naan ee nok reko, ma nanoniꞌ nahiin in aanh ein amsaꞌ. 13 Tuaf reꞌ njair atutaꞌ-abhaꞌet neu jemaꞌat rek-reko, ro tebe biak ein of anhormaat sin. Ma sin nabrain ma ka namtaun fa he naꞌuab ein anmatoom nok sin rais pirsait neu Yesus Kristus.
Hit rais pirsait ii in aꞌsukin
14-15 Tius! Au ꞌharap ma ufnekan he kreoꞌ goes anteniꞌ te, au ꞌeit iꞌmakius ko. Karu au uꞌbakeꞌ kreꞌo te, surat reꞌ ia of antea nahuun. Au ꞌtui surat ia, he utoon ko mꞌak, Uisneno In aasr ein ro he nmonin on reꞌ mee. Kais amnikan, Uisneno naan, Uis Amonit. Iin na nahuum on reꞌ umi reꞌ nahaek ee nbi fatu ꞌsukif ma nii ainaf reꞌ maꞌtaniꞌ. Nok ranan naan, sin ro he natnaat Uisneno In noniꞌ amneot.
16 Uisneno nfei nrair rais maꞌnifaꞌ koꞌu naꞌko hit rais pirsait. In aꞌsuikn ii, on nai:
Kristus neem anrair jen anbi pah-pinan ia,
anpaek humaf ma masaf mansian on reꞌ hit.
Uisneno In Asmaan ee msaꞌ nakriraꞌ bukti mnak,
Naiꞌ Yesus naan, Tuaf neek amneꞌo ma amnonot.
Ma Uisneno In ameupt ein sonaf neno tunan niit Ee msaꞌ.
Uisneno nait nasaeb Ee ntaam neu sonaf neno tunan,
rarit nanaib ma ntunaꞌ naꞌraatn Ee.
In reetn ee nasiin on ma nabeon on anfuun am nateef uuf ma pah anbi pah-pinan ia msaꞌ.
Anbin mee-mee anbi pah-pinan ia, tuaf anpirsain anrair Je goen.
~2~Uab Yunani nbi reꞌ ia, ntui nak, γυναῖκας (gunaikas naꞌko γυνή gunei), in aꞌmoufn ii nak: 1) ‘sin feek ein’, aiꞌ 2) ‘bifee’. Atoniꞌ bian nak, uab naan in aꞌmoufn ii 3) bifee reꞌ naꞌnaaꞌ jemaꞌat. Mes aꞌmoufuf reꞌ no teun ii reꞌ ia, uab Yunani npaek kata es anteniꞌ (mkius Roma 16:1).
