1 Hano wayh-om, hmo prueyn hiykwe uwrsa har me kokwe heyn-non-ok pankaw kiy-me o? Ara, hwon penkin uwr lwak e, enekwei hno yor me lira mesor anon anon ankin, hne kokwe posokwaw hiy-lok ley. Payhokuaw, hunkwe har me-aw heyn-non-ok me ankin, sawk hunkiaw kokwe yor piap liyliy-aw mon ankin, hunkwe hunkiaw-ayay mon piapay. [a] 2 Hromkwe senkin nonkway, God hiy uwrsa mo yor piap-araw senkin senkin me lira mesor anon anon ankin, mey sokukwe hiykwe hyo okar-ok arian so yerki nonaw meio ey. 3 Ara, yor piap-araw, hwon uwr har me ma me-maw mokwe, hunkwe seyr liyliy-aw mon. Hai, God hiy uwrsa mo weynpaweyn me mesor anon anon ey hokwe, hunkwe yerki penkin non hakan ey so? 4 Hmey, senkin pak, hunkwe God so hiymon-yor kraiar o, uwrsa piap-araw me enekwei meipey ipan lwak yor o, hreme meinkiowp ma naruok yor o, somokwe hunkwe me-piap-ma-piap. Hunkwe nonkway lwak e, God so hiymon yor yaprue kokwe, hreme yerki uron kankoum sow ey mon hiy-anok anok nok. [b]

5 Sawk hno uron ma piar kraiay o, seyr hno uron ma kankoum sow lopa o, God so aw-mar ke ayaw-ar nuw-mon pipi-yay ie. Hyo aw-mar sohokwe hiykwe eypok pariawey-ar sok mon ousne hrahra ha ey, enekwei hiy hyo mesor anon-anon-ok luw-luw-aw lowpwarowp me mesair non. 6 Enekwei sohokwe, God hiykwe uwrsa lowpwarowp me kokwe, hom pay mey ke meio e, hiykwe seyr mey sohok ko liy-liy-aw ma-sahre kow. [c] 7 Uwrsa, yor yaprue me-aw ma mon wayr, seyr God so panpaniowni o, uru ihey-ar o, lokrue ey lopa o, seme ma pawk mokwe, hme kokwe God hiykwe su lwayr peyow peyow ey se ya kow a. 8 Sawk uwrsa ompreir kawk yor non o, seyr okar-ok me hyaw ma lwak o, seyr yor piap-araw mo meyki ma ley o, hme kokwe God hiykwe, hyo kasaw lon hohuaw yor aw-mar ipey-ar non hokwe, ipey-ar swanonay kow ey. [d] 9 Uwrsa lowpwarowp, yor piap-araw me ma mon yorpayor wayr somokwe, hmo owh mon kokwe low aiopey o, aw aiopey hay nak-ok ey o, sohom lousne ey. God so aw-mar hokwe peyr Juda me loum pie nok, hai, uwr-kayn irweyk me ma-loum ok. 10 Sawk uwrsa yor yaprue me-aw ma mon wayr mokwe, hme kokwe panpaniowni yor o, uru ihey-ar o, seyr liwak marowhway yor o, seme kow ey. Hiykwe Juda me hiy-mon pie nok, hai, uwrkayn irweyk me hiynak-mon ihey ok. 11 God hiykwe uwrsa me lira mesor anon anon ankin, hiykwe uwrsa, uwrku saku penkin mon lwak e, hiykwe lowpwarowp me kokwe mo liy-liy-aw lira anon anon ey.

12 Uwr-kayn irweyk me kokwe Moses so sow me kow pa. Uwrsa somokwe yor piap-araw me meio ankin, lokrue pror ha ey, mo hom Moses so sow lopa lwak hi. Seyr liy-liy-aw, uwrsa Moses so sow me ma nakruok, seyr yor piap-araw me ma mon, hmekwe Moses so sow hokwe senkin lira me anon ey, homkwe heyn non. 13 Payhokuaw, uwrsa Moses so sow me kwahnaw ma lonuayk, sawk meyki nak-pyay lopa me kokwe, God hiykwe luw-luw-aw-ok liy me ley. Sawk uwrsa, sow lowpwarowp God hiy Moses se ma kow seme ma lonuayk pyay meio wayr mokwe, God hiykwe hme-aw luw-luw-aw-ok me ey. 14 Okar, uwrkayn irweyk homkwe Moses so sow me lonok pa. Sawk homkwe hmo sow arian, homkiaw hmo uron arian mon ma nanpanan mo meyki mon nak-pyay meio. Suw senkin mesair kow, uwrkayn irweyk hom Moses so sow me lonok lopa lwak hi, hmekwe hmo sow arian homkiaw hiy-anok anok. [e] 15 Uwr-kayn irweyk mo liwak yor senkin mokwe, hreme senkin mesair kow, ok-kopi har Moses so sow hok ma me mokwe hmo uron mon po mey iawon. Enekwei uwrsa sohom yor piap me mon ankin, hmo nanpanan yor, uron ko homkwe hme senkin me-kow, “Homkwe heyn non”, seyr hom yor yaprue me mon ankin, hmo nanpanan yor, uron ko homkwe hme senkin me-kow, “Homkwe heyn lopa.” 16 Seyr eypok pariawey-ar hokwe, uwrsa mo yor ouon-aw ma lwak sue somokwe, God hiykwe Jisas Krais so kueir nonaw lira mesor anon anon ey, ok-ihey, ha ma mesor ko liyliy-aw.

17 Hai, hmo har homkwe penkin mo? Hunkwe senkin me, hunkwe Juda-ar, seyr hunkwe senkin nan, Moses so sow mokwe hne hiymon popriy ey. Seyr hunkwe senkin nak-me-heyr, hunkwe God so uwrku arian. 18 God so uron ko hokwe, hunkwe po nonkway. Seyr hunkwe God so yor yaprue me liy lira lahan. Payhokuaw, God so sow, Moses se ma kow hokwe hne po hiymon sorasor. 19 Seyr hunkwe hunkiaw-ayay senkin nuw-nonkway, hunkwe uwrsa nene-kopyo mo puar-now, seyr uwrsa eym-nawp mon ma lwak me yar kow. 20 Seyr hunkwe senkin nak-nan, hunkwe uwrsa lawk-lawk ey me hiy-anok anok uwr, seyr ney nopre me hiymon sorasor-uwr. Moses so sow hmo iha mon ma lwak me hokuaw, homkwe senkin nan, nonkway lowpwarowp o, God so ok-ar-ok o, sohom mo meykyar mokwe papo nuw-nonkway. [f] 21 Okar, hunkwe har me senaw hiymon sorasor, hai, hunkwe hne nian hiymon sorasor pa panoke lwak o? Hunkwe senkin mesor kow, yokun peie lopri o, hai, hunkiaw kokwe sawk yokun lopri lopa lwak o? [g] 22 Hunkwe uwrsa me senkin me, sa-yokun uwr-yokun peie nweyh kane o, hai, sawk hunkiaw kokwe yokun nweyh kane lopa lwak o? Seyr homkwe okrei-god me me-piapmapiap, hai, hunkiaw kokwe, mon senkin senkin, okrei-god mo a ko me yokun lopri lopa lwak o? 23 Seyr hunkwe senkin nak-me-heyr, hunkwe God so sow me nonkway. Hai, hunkwe sawk God so sow me payhokuaw kamaun sow o? Hwon senkin ma lon sohokwe, God se mon piapay. 24 Ok sokukwe God so mamey mon kokwe senkin mey, “Juda mo weynpaweyn piap-araw me hokuaw kokwe, uwrkayn irweyk homkwe God so uru se me-piapmapiap wayr.” [h]

25 Hunkwe God so sow me nakruok kraiay ankin, Juda mo yor, owh-ohi me ma lei mapru sow kow hokwe, hne liy hiymon. Sawk hunkwe God so sow, Moses se ma kow me nakruok pa lwak ankin, hunkwe owh-ohi se ma lei ampru sow kow lopa se hieyn lwak. 26 Sawk uwr owh-ohi ma lei ampru lopa sohokwe, God so sow me nakruok ankin, hye kokwe senkin lira nonkway ey, hiykwe uwr, owh-ohi ma lei ampru sow se hieyn lwak. [i] 27 Juda-om, suw senkin, uwrkayn irweyk, owh-ohi ma lei mapru lopa, sawk God so sow me ma pyay somokwe, hme senkin lira me ey, homkwe heyn non. Mo hno owh-ohi se lei ampru sow hi, seyr hwon Moses so sow paraw ma mey me nakruok hi, uwrkayn irweyk homkwe hne senkin lira me ey, hunkwe God so sow me kamaun sow-uwr.

28 Hai, Juda-uwr-ar hokwe posokwaw so? Uwr owh-ohi ma lei ampru sow hiy non pak. Korey. Payhokuaw, lei ampru sow yor hokwe, hne Juda-uwr-ar liy mon ousne ley. Owh-ohi se ma lei mapru sow yor yaprue hokwe, iwar so ohi kumay ko se me pey, 29 sawk Juda-uwr-ar hokwe iwar so uron se me. Juda-uwr-ar hokwe, owh-ohi uron ko se ma lei ampru sow hiy-non. Mey senkin sokukwe Moses so sow hokwe liy meio ousne ley, sawk God so Niohney hiykwaw-aw nuw-meio ousne. Uwr senkin so uru hokwe uwr ki ko hom lowk nakie ey korey, God hiykiaw-aw lowk nakie. [j]

<- ROM 1ROM 3 ->