ROM 11

God hiy Israel me uron ma lowk hiy non

1 Sa hakwe hme senkin ma-mesopok: Hmey, God hiykwe hyo uwrsa arian me papo me-puar lowpway? Korey law-ar. Payhokuaw, mo hakiaw seyn, Israel-uwr prueyn hiy non. Hakwe Abraham so ney-nona, seyr Benjamin so uwrku ko. [a] 2 God hiykwe hyo uwrsa arian hiykiaw peyr-mon-ar ma nuw-iaup pie me kokwe, korey me-puar lowpway pa. Homkwe ok mamey porih mon paraw ma mey ke kwa nanpanan. Ok sokukwe senkin mey: profet Elaija hiykwe Israel-uwrsa me kar ley lopa ma lwak hokwe, hiykwe God se senkin mesopok kraiay, 3 “Hakamay, Israel homkwe hno profet me po lokin kwor-ma-kwor okrue. Seyr hno alta, omeme yaprue me naws kow ey me po lokin housay lowpway. Hakwe hakiaw-aw kiy-nuw-wak, seyr homkwe hane ma lokin kwor okrue e nakrion say lokruok.” [b] 4 Hai, God hiykwe hye kokwe penkin ma-sahre onuayk me so? Hiykwe Elaija se senkin ma-sahre onuayk me, “Ara, hano uwrsa arian Israel me kokwe, hakwe 7000 sankaw po lira lahan me-iaup prosue. Uwrsa somokwe okrei-god Bal se kokwe pamuow kampueys pa.” [c] 5 Seyr enekwei enkin ohiy seyn, God hiykwe hyo maym kow yor ko kueir nonaw, Israel-uwrsa har-har-aw ney-aw lira lahan me-iaup prosue nonaw lwak. 6 God hiy Juda me ma lira lahan iaup hokwe, hyo maym kow yor ko kueir nonaw lahan iaup, sawk hiykwe mey, Juda hom ma meio me lahan iaup pa. Payhokuaw, God hiykwe uwrsa, mey hom ma meio me lahan iaup hokwe, God so maym kow yor kokwe maym-ok liy me ley. [d]

7 Hai, Israel-uwrsa mokwe penkin lwak a? Mo hom mey senkin senkin me God se nakrion say meio kow liok, homkwe God so luw-luw-aw yor ke lonok pa. Sawk uwrsa har, God hiykiaw ma lahan iaup homkwaw lonok. Sawk hmo har mo uron mokwe, God hiykiaw ku-mein me hieyn nuw-mon hihi-yay. 8 God so mamey porih hokwe mo senkin me,

“God hiykwe uwrsa seme kokwe, niohney ley-hon-a-hon ey se kow. Homkwe nene non, sa liy lira ley. Homkwe nweyk non, sa liy lonuayk ley. Enekwei ohiy seyn, homkwe senkinaw lwak wayr.” Lo 29:4; Ais 29:10

9 Devit hiykwe seyr ok liy-liy-aw senkin me,

“Hmo ayay hokruw-a yor sokukwe, inor-naw ke hieyn ka lousne, seyr naw-pway ke hieyn ka lwak. Homkwe seyr ka makuayk, seyr hmo heyn me hokuaw kokwe hmekwe ka ma-sahre mon piapay. Sng 69:22

10 Uwrsa sohom mo nene mokwe waw-pow ka lyay, sa homkwe lira pa ka lwak, seyr hmo sumow mokwe enekwei enekwei hmo low arian hom ka lyay low-a-low eymueys kawk kumey.” Sng 69:23

11 Hakwe hme senkin sehe makiy-me-sopok ey: Hai, Israel hom ma lour sayah-ayah mokwe, homkwe po nuw-makuayk sawor-awor ha lowpway? Korey law-ar. Sawk Israel mo kamaun sow yor ko kueir nonaw hokwe, God so huonok-prosue-yor hokwe uwrkayn irweyk mo owh mon sokwe lousne. God hiykwe senkin sehe lon, Israel hom uwrkayn irweyk me lira way ompeys ma-peys e. [e] 12 Suw senkin, Israel mo kamaun sow yor ko kueir nonaw hokwe, God hiykwe hyo maym ihey-ar mokwe uwrsa poya-poya mo owh mon po mon ousne. Seyr Israel hom meiaw mon ma lour anyan nok ko kueir nonaw hokwe, God hiykwe sawk uwrkayn irweyk me seme maka-sahre huonok hiymon ihey. Israel hom ma makuayk hokwe, uwrsa ki serey serey suko me hiymon, hom God so owh mon ley e. Hakwe sawk senkin sehe nan, Israel lowpwarowp hom God so owh mon ma-le swa-hokruw konpakon ankin, yor sokukwe God so maym kow yor ihey-ar ke mon ousne ey, paraw hrom ma lira lopa senkin.

13 Ok, ha ma kiy-me okukwe, hakwe hme uwrkayn irweyk me kiy-me. Aposel-mey, ha uwrkayn irweyk mo ompok mon ma kiy-meio ohokwe, hakwe ipey-ar nuw-nan. 14 Hakwe aposel-mey sokukwe senkin sehe meio, hano uwrku Israel homkwe, God hiy uwrkayn irweyk me ma hiymon me ka lira way ompeys-ma-peys. Seyr Israel har-har-aw me God hiy yerki sohiy so kueir ka me-huonok prosue. 15 Payhokuaw, God hiy Israel me ma lour swaweyr yay ha hokwe, hiykwe mey yaprue kamon, senkin ma-sahre mon ousne. Mey yaprue sokukwe senkin: Hiykwe uwrsa lowpwarowp hyo awia-pow ma lwak mokwe, yerki hom hyo wayh ihey-ar lwak ey ke po kampi kow. God hiy Israel me ma lour swaweyr yay ha so ayay mokwe, yaprue senkin me leip ankin, hai, God hiy Israel poya-poya me ma-huonokyaw yawriy ankin, mey sohok ko ayay mokwe penkin me leip ey so? God hiy hme ma ma-me-huonok yawriy sohokwe, lokrue uwrsa me su ma me-sian wayr me hieyn. 16 Homkwe nonkway, hunkwe ihey mo naw-kopi peyrmawk ko ke God se kow pie ankin, ihey mo naw kopi sokukwe pekney-weys lwak. Seyr ihey mo naw kopi sokukwe sawk hno ihey mo naw lowpwarowp me pekney-weys mon ousne liyay. Seyr now kamon so meyk hokwe pekney-weys lwak ankin, kueim lowpwarowp mokwe seyr pekney-weys lwak.

17 Israel homkwe oliv-now wueir-ar mon ma saro se hieyn. Sawk oliv-now sohiy so kueim har mokwe papo nekie kama-pwa kuayk sakuayk. Sawk uwrkayn irweyk hunkwe, oliv-now sapa ko so kueim ke hieyn. Hnekwe ka-nekie kaun nok ok, oliv-now-ar so kueim mo yop-yop mon nak-saronay osi hor kraipakrai. Hunkwe sawk oliv-now-ar sohiy so nioh se non-owswa-liy kowp-kowp ie. [f] 18 Sawk hunkwe senkin peie nak-me-heyr o, “Hakwe oliv-kueim wueir ko mo eir mon lwak.” Sawk hunkwe nak-me-heyr e nan ankin, hunkwe peyr ok okwe kwa nanpanan. Hunkwe oliv-now sohiy so meyk se hiymon owk naw-a-naw ie pey, sawk oliv-now sohiy so meyk hokwe hne hiy-mon owk naw-a-naw ie. 19 Sawk hmo prueyn hiy senkin nak-me-heyr lak, “Oliv-now-ar so kueim mokwe seme lon kama-pwa, hane hmo yop-yop mon nak-saronay osi hor meio way kraipakrai e.” 20 Mo okar. Sawk Israel me kokwe seme nekie kama-pwa sow, payhokuaw, homkwe Hakamay se nan kiykiy-ay pa. Sa hunkwe sehe lorok kraiay, payhokuaw, hunkwe nan kiykiy-ay. Hwon senkin ma lorok se, hno uru arian se peie nak-owk nakie o, sawk hunkwe kwa nak-hok. 21 Payhokuaw, hunkwe kwa nanpanan, God hiykwe oliv-now-ar so kueim mokwe ma-isay wak lopa lwak ankin, hne seyn, hiykwe liy ma-isay wak ley.

22 Hunkwe God so nan ihey yor o, hyo me-hripahri-ok o, seme kwa nanpanan. God so me-hripahri-ok kokwe uwrsa ma makuayk sakuayk me po mesair kow. Sawk hunkwe hyo nan ihey yor ke-aw nakruok ankin, hiykwe hnekwe hyo nan ihey yor kokwe senkinaw-aw mesair kow ey. Sa hunkwe God so nan ihey yor ke lokriy hain ankin, hnekwe nekie kampwa lway swasow. [g] 23 Sawk Israel homkwe hmo kamaun sow yor seme preisia hain ankin, hmekwe hmo yop arian, hom paraw ma lwak mon, ma-nak-saronay osi hor meio way kraipakrai ey. Payhokuaw, mey senkin mokwe God hiykwe liy mon ousne. 24 Suw senkin, hunkwe kueim oliv-now sapa ko me ma nekie pwa-say me hieyn. Sawk mo hwon oliv-now sapa ko so kueim ke hieyn lwak liok, hne kokwe oliv-now-ar mon po nak-saronay osi hor meio way kraipakrai. Sawk omok kokwe God hiykwe Israel mo kueim, paraw ma nekie pwa-say seme manak-saronay osi hor meio way kraipakrai ankin, sohokwe hyekwe honon honon liy lwak ley, payhokuaw, homkwe mo oliv-now serey suko arian.

Israel lowpwarowp me kokwe ya ma-kahya huonok prosue a

25 Hano wayh-om, hakwe senkin nan, homkwe God so ouon-aw-ok kamon ke kwa nuw-nonkway. Sawk homkwe God hiy hme ma me-huonok me hmo uru arian me lowk nakie lak. Ouon-aw-ok sokukwe senkin, Israel mo yor, makwey ku-mein ma lwak mokwe, senkinaw lwak wayr lopa. Sawk God hiykwe Israel me kokwe enekwei uwrkayn irweyk lowpwarowp hom God so owh mon le lowpway non, manuw-me-huonokyaw prosue lowpway ey. 26 Sawk yerki sohiy non kokwe, God hiykwe Israel lowpwarowp me maka-me-huonok prosue ey. God so mamey porih hok ma me, senkin,

“Omok kokwe uwr prueyn, Israel me kahya huonok prosue ey hiykwe, mnuw Saion ko se le ey. Hiykwe Jekop so ney-nona mo yor God se meyki ma kankoum sow, seme mon-say kow ey.

27 Hakwe Israel mo weynpaweyn piap-araw me monsay kow hokwe, hakwe sokior-ok enkin hme nion non-me-sakon kawk ey.” Ais 59:20-21

28 Israel hom God so ok-ihey ke ma kamaun sow mokwe, homkwe sawk God so awia-pow seme lwak. Sawk Israel mo kamaun sow yor ke hokuaw kokwe, God hiykwe hme uwrkayn irweyk mo yerki se kampi kow. Sawk God hiy Israel mo iwey-om me ma lira lahan iaup huonok se hokuaw kokwe, hiykwe Israel me uron-pi ko-ar sehe lwak. 29 Payhokuaw, God hiy hyo maym senkin senkin uwr pehe kow e, seyr uwr pehe me-huonok iaup e, hiykwe hyo uron se irweyk eyn liy ma-kankoum meio ley. 30 Uwrkayn irweyk ama, paraw kokwe homkwe God so ok ke kamaun sow uwrsa. Sawk enekwei enkin ohokwe, Israel hom God so ok ke ma kamaun sow me hokuaw kokwe, God so uron lowk yor hokwe sawk hme seme kow. 31 Seyr enekwei enkin ohokwe Israel homkwe God so ok me kamaun sow. Sohokwe senkin sehe lwak, God so uron lowk yor hokwe, enekwei enkin ohokwe, Israel homkwe seyr liy lonok, uwrkayn irweyk hom ma lonok senkin. 32 Payhokuaw, God hiykwe uwrsa lowpwarowp me po lway pruwma-pruw, hom hmo kamaun sow yor arian ko ouon mon lwak e. Hiykwe senkin sehe lon, uwrsa lowpwarowp homkwe, hyo uron lowk yor ke ka lonok e.

Pol hiy God so uron ihey-ar se ma me-ihey hiy non

33 Me-o, God so mawkhow ihey-ar nonkway aiopey hay non mokwe, kraiar nuw-wak, seyr iway-ar nuw-wak.

Hyo lahan iaup yor mokwe, liy meir sor lowpway ley, seyr hyo yerki mokwe posokwaw pyay ley. Ais 55:8-9

34 God so mamey porih hokwe mo senkin me,

“Hai, Hakamay so mawkhow hokwe poso uwr hiykwaw nonkway a? Hai, hyekwe okpey poso uwr hiykwaw hiy-sor a?” Ais 40:13

35 Hai, uwr prueyn hiykwe God sekwe pay-ay se nuw-kow se, God hiykwe hyekwe sehe ma-sawkriy kow a? Jop 41:11

36 Payhokuaw, omeme lowpwarowp mokwe, hyo iha non po monhre, seyr hyo kueir nonaw kiy-wayr, seyr hyo owh arian mon ma-ley ey. Panpaniowni hokwe hyo owh mon-aw ka nuw-wak peyow peyow. Okar.

<- ROM 10 ROM 12 ->