1 Sa hane kokwe now-ho kamon luw-luw-aw sor-mey non se lwos kow, seyr senkin nak-me kow, “Hunkwe ley nok, God so a pekneyweys o, alta o, hehe kwa meir-yay. Seyr uwrsa serey ma kampueys me-ihey sohom mo meir me nak-sor.” [a] 2 Sawk hunkwe God so a-yier ki apau meykyay-ar ko se peie meir o, payhokuaw, a-yier meykyay-ar ko sohokwe uwrsa God se ma nan kiykiy-ay lopa me po kow. Uwrsa somokwe yier pekney-weys aiopey hay sehe enekwei yeyn 42 sankaw lanio our seipasei ey. [b] 3 Seyr hakwe hano mey-uwr prueysyar hane ma nonkway se ma mesor me kokwe krai se kow ha ey. Hohkwe unuaw liwak omeme me lie nok nok, weynpaweyn omok lousne ey me profet-ok non mesor ey, eypok enekwei 1260 sohiy non kokwe. 4 Uwr prueysyar sohokwe oliv-now pireysyar, seyr lam-sey kreysyar, ki ohiy so Hakamay so inour mon ma lorok hom non. [c] 5 Uwrsa hehe mon piapay e mon ankin, ya kokwe hoho woki ko me lousne nok, hoho awia-pow me loumpru kreik lowpway ok. Hehe kokwe unsaney posokwaw mon piapay e mon e, hmekwe yerki sohiy non mon okrue ey. [d] 6 Uwr prueysyar sohokwe krai, non se piar sous ey non, sueyr hiy lows lopa lwak e, hoh profet-ok me mesor enekwei hokwe. Hohkwe krai non, hu me nioh eyn mon ousne ey mokwe. Hohkwe seyr krai non, ki se low piap-araw senkin senkin non mon piapay ey hokwe. Hohkwe enekwei kraiar mon ousne e mon ankin, hohkwe liy. [e]

7 Seyr enekwei hoh hoho mesor-kumay-ok me mesor lowpway ankin, ay kwaresi piap-araw hiykwe ki-saw limon lopa ko se ar-ousne ha nok, hehe aw non-ono swakakar okin kwor okrue ok. [f] 8 Hoho owhi-sopok mokwe taun seirpey so yerki mon non-won ey. Taun sohokwe Jerusalem, hoho Hakamay se ma nak-okin pror kawk sawan hiy non. Taun sohokwe owhnan-ok non kokwe, senkin mowie, Sodom, Isip leys. [g] 9 Unsaney owh-ohi irweyk irweyk ko o, uwr-kayn lowpwarowp ko o, wouk-ok senkin senkin non o, uwrsa kipay lowpwarowp ko o, homkwe eypok krompri o, eypok kamon so mon-kopi o, sankaw lowk-yay-yay ira ey. Sawk homkwe me-puar ey, hoho owhi-sopok me lopru inon kreik lopa. 10 Uwrsa ki ko homkwe kar ley ey, hehe lokrue ankin. Homkwe iray-ay lunay-a nok, wayh-wayh me nion omeme non-sawos opri ok. Payhokuaw, profet-uwr prueysyar sohokwe hmekwe low ompuay kow mo.

11 Eypok krompri o, eypok kamon so mon-kopi o, sohom mo meyki hokwe, howniy su ma lwayr peyow ey God so mon ma le se ma-losiahakar kawk kow. Hohkwe sa hoho oiow arian non sehe non-oksian iarok. Uwrsa hehe ma lira homkwe sawk seme nuw-hok krwepakrwe. [h]

12 Sa profet-uwr prueysyar sohokwe wouk-ok aiopey hay kamon, nonkumey ko hok hehe senkin me se lonuayk, “Hohkwe erey kwa lie.” Hoho awia hom nakrok ira nonaw, hohkwe sawk waw non nak-ie, nonkumey mon. [i]

13 Enekwei sohiy nonaw kokwe, kina kwaresi piap-araw hiy pa ki-nuw-way wei-a-wei. Taun sohiy so kopi iha seys mo kopi kamon hokwe nuw-mon piapay lowpway. Seyr uwrsa mokwe 7000, sankaw way wei-a-wei okin kuor-ma-kuor say. Har su ma lwayr somokwe sawk, seme nuw-hok krwepakrwe. Homkwe sawk God nonkumey ko se seirpey-ok seme me-ihey. [j]

14 Low krompri mo kreysyar kokwe papo kiy-ousne. Sawk low krompri mo pariawey-ar kokwe peypey kiy-ousne ey korey. [k]

15 Ensel pariawey-ar hiy hyo hu pariawey-ar se lou menkin, nonkumey hokwe sawk wouk-ok aiopey hay hom senkin lokre me,